Innovación e as universidades galegas, xuntas para procurar software libre para as nosas empresas

A Consellería de Innovación e as tres universidades galegas están a afianzar unha alianza co obxectivo de incrementar a presenza de ferramentas de software libre no empresariado galego. Tras esta iniciativa, na que Innovación concorre a través da plataforma Mancomun.org (impulsada polo propio departamento e por desenvolvedores e usuarios de software libre de Galiza) áchase un interese por desligar no posible ó sector privado galego dos custos que supón o pago de certas licenzas de programas pechados. Amais diso, a alianza busca achegar máis mobilidade e liberdade de movementos cuns programas de fonte aberta (algúns desenvolvidos en parte na nosa terra) que se poden afacer ás necesidades do usuario.
Segundo se establece nas bases do acordo, o proxecto levará consigo máis de 70.000 euros e dará comezo de xeito experimental, poñendo a proba os programas libres nas empresas para avaliar o seu rendemento. Nesta primeira fase da iniciativa, terá especial protagonismo a Escola Superior de Enxeñería Informática de Ourense (Universidade de Vigo), que abordará un estudo sobre as solucións abertas encamiñadas á xestión empresarial, rastrexando as opcións máis acordes ás condicións do noso sector. Unha vez que se teñan localizado estes programas, implantaranse de xeito experimental co fin de comprobar o seu funcionamento na actividade cotiá.
Pola súa banda (informa a plataforma mancomun.org), o Departamento de Matemática Aplicada da Universidade de Santiago en colaboración co Departamento de Matemáticas da Universidade da Coruña, afondará na busca de aplicacións libres de simulación numérica na industria. A partir de aí, farase unha listaxe de programas abertos, na súa meirande parte de balde, especialmente axeitados para incrementar a rendibilidade e produtividade das empresas galegas.