Iniciador Galicia revisará o impacto da Internet no sector do viño

Tras unha intensa entrada de ano por parte de Iniciador Galicia, o evento de emprendedores tecnolóxicos trasládase o vindeiro 11 de febreiro ao Centro Comarcal de O Ribeiro en Ribadavia, para celebrar unha xornada na que o viño será o eixe central para destacar o papel que está a xogar a Internet nos cambios do seu modelo de negocio.
A asistencia á xuntanza é libre e de balde, estando especialmente dirixido a profesionais e emprendedores do sector TIC para que poidan tecer redes entre eles, e contará con presentación sobre a temática a tratar a cargo de Faustino Sotelo, empresario vitivinícola ourensán da adega Pazo Casanova, Greg Pêvot, emprendedor e experto en comercialización de viño a través de Boottle e Javier Varela, de Toctoc Media, quen recibiu o Premio EGANET 2010 á Mellor Estratexia de Publicidade e Marketing Online polas súas campañas coa adega Paco&Lola.
Esta entrega de Iniciador Galicia botará a andar o mencionado venres ás 19:00 horas, e os interesados en participar poden inscribirse a través de Facebook ou por correo electrónico. O evento conta coa colaboración da Concellería de Promoción Económica de Ribadavia.