Inicia Coworking impulsou 20 firmas innovadoras de Lugo
mércores, 7 de xuño do 2017
Este martes o
Concello de Lugo fixo reconto dos resultados de Inicia Coworking,
unha iniciativa de emprendemento e innovación desenvolvida coa
Escola de Organización Industrial (EOI) e mediante a cal 20 novos
empresarios locais tiveron oportunidade de impulsar cadanseus
proxectos (contando de maneira gratuíta con apoio individual e
personalizado) até convertelos en negocios. O balance veu da man da
alcaldesa Lara Méndez, que lembrou que a primeira fase do plan
Inicia, que se desenvolveu nas instalacións do CEI Nodus durante os
últimos cinco meses, terá o seu “broche de ouro” este xoves,
cunha gala no MIHL, na que os emprendedores exporán os seus
proxectos ante o sector produtivo local, galego e estatal. Os actos,
que contarán coa presenza do reputado economista Emilio Duró,
desenvolveranse entre as 17:00 e as 22:15 horas. A alcaldesa
salientou a “calidade e as posibilidades de futuro” das 20
start-ups, boa parte delas ligadas ás novas tecnoloxías e o
turismo.
O reconto de Inicia Coworking contou tamén coa
presenza ca concelleira de Economía, Emprego e Desenvolvemento
Económico, Ana Prieto, a área municipal que coordina a iniciativa;
a deputada provincial de Promoción Económica e Social, Sonsoles
López Izquierdo; o mentor dos proxectos emprendedores, Roberto
Touza; e os emprendedores que tomaron parte na primeira convocatoria
do programa; así como Rodolfo Ojea, xerente da Fundación CEL;
Mauricio Repetto, presidente da Asociación de Empresarios Novos de
Lugo; Beatriz Varela, presidenta da Asociación de Mulleres
Empresarias de Lugo; e José María Seijas, presidente da Federación
Galega de Comercio, entre outros representantes do mundo empresarial
da cidade e da provincia.
Lara Méndez tamén informou de que está aberta a
segunda convocatoria do Inicia Coworking, da que se beneficiarán
outros 20 emprendedores. Os interesados poden solicitar a súa
participación a través da páxina web do Concello, www.lugo.gal,
até o vindeiro 23 de xuño. Tamén lembrou que o vindeiro ano
abriranse dúas convocatorias máis, coas que se ofrecerá apoio a
outros 40 emprendedores. “Queremos reter en Lugo o talento dos
lucenses, que é moito, como fica demostrado con esta iniciativa”,
dixo, engadindo que nos últimos orzamentos o Concello destinou 5
millóns de euros a iniciativas vinculadas co fomento do emprego.
Pola súa banda, o mentor dos proxectos
emprendedores, Roberto Touza, puxo en valor o traballo dos profesores
que pasaron polo programa Inicia Coworking, “do talle de Andrés
Pérez Ortega ou Javier Martín, de recoñecido prestixio a nivel
nacional” e dos mentores, que prestaron un asesoramento persoal e
individualizado.
Pola súa banda, a deputada provincial de
Promoción Económica e Social, Sonsoles López Izquierdo, felicitou
ao Concello por esta iniciativa e o seu “rotundo éxito”, e tamén
aos emprendedores. Tamén recordou que a Deputación de Lugo
colaborou co Inicia Coworking a través da Fundación TIC coa
elaboración dun vídeo promocional no que os propios 20
emprendedores beneficiarios desta primeira edición explican o seu
proxecto. Este material audiovisual difundirase nas redes sociais e a
través dos medios de comunicación, engadiu,
O Concello desenvolve o plan Inicia Coworking en
colaboración coa Escola de Organización Industrial (EOI),
dependente do Ministerio de Industria. Cun orzamento de 800.000
euros, fornecerase entre este ano e o 2018 de xeito gratuíto a máis
de 260 lucenses un apoio integral, individual e personalizado, para
poñer en marcha con éxito a súa empresa, asegurando a súa
viabilidade tanto técnica como financeira.