Ineo organiza este xoves un novo seminario sobre métodos axeitados para abrirmos mercado
martes, 11 de outubro do 2011
Francisco Javier
Balbín, director de Comercio Exterior de Banco Sabadell, estará este xoves en
Vigo para falar de diferentes métodos que temos ao noso alcance para romper fronteiras
no eido empresarial e comercial cos nosos produtos e servizos tecnolóxico-dixitais.
Balbín estará en Vigo da man da asociación TIC Ineo,
no marco do seminario Negociar,
contratar, exportar, cobrar, un encontro que se celebra este xoves 13 ás
11.45 horas no salón Galicia da sede da Confederación de Empresarios de
Pontevedra. A cita, que é de balde (dándonos de alta en comunicación@ineo.org),
xirará arredor das posibilidades que temos de exportar os nosos produtos e
servizos, facendo fincapé nos métodos máis eficaces e rendíbeis.
O seminario, como
dixemos, vén da man de Ineo, que conta para esta actividade coa axuda da CEP e
o financiamento do IGAPE. Diríxese o evento a tódalas persoas que participan no
proceso de venta ao exterior (xerentes, equipos comerciais, responsábeis financeiros,
persoal de administración) co obxectivo de darlles a coñecer as súas diferentes
fases: dende a negociación até que finalmente se recibe o cobro. En definitiva,
tratarase de responder ás seguintes preguntas:
Como se entrega a
mercancía ou servizo?
Contratamos as
coberturas axeitadas en canto a seguros ou risco de cambio?
Que medio de
cobro empregarase?
Esta operación de
exportación, contará co mecanismo de financiamento máis axeitado? Está previsto
o xeito de resolver as desputas?
A idea de Ineo
con este novo seminario profesional de internacionalización é dar resposta
cumprida a estas e outras cuestións, todo achegado baixo un enfoque “eminentemente práctico” e seguindo unha
premisa básica: non existe a venda até que non se cobra.