Ineo e FEGAXE celebran este martes un obradoiro para facilitarlles aos emprendedores o camiño das axudas
luns, 9 de abril do 2012
- O Pazo da Cultura de Pontevedra é o emprazamento elixido para esta actividade
A asociación galega Ineo, en colaboración con FEGAXE, celebra este martes 10 de abril unha
actividade de natureza práctica para facilitar que entre emprendedores e
recursos de financiamento público e privado haxa o menor número de atrancos. Ou
sexa, para que no caso de estar proxectando un proxecto innovador nunha empresa
ou termos entre mans unha empresa nova saibamos exactamente as teclas que tocar
co fin de recadar os meirandes e mellores apoios posíbeis. A actividade desenvólvase baixo o seguinte epígrafe: Obradoiro sobre Financiamento para non financeiros:
Estratexias de financiamento para emprendedores. A xornada, amais do devandito,
servirá a para facilitar a resolución de dúbidas e consultas dos asistentes,
que terán á súa disposición a representantes de Novagalicia Banco e Banco
Sabadell.
O obradoiro contará con relatores de primeira
liña de innovación: axentes, expertos e diversos representantes da Administración
e de asociacións empresariais afeitas no seu día a día a traballar co
coñecemento, a creatividade, a procura de apoios para as firmas ás que dan
acubillo e a busca de novos mercados.
A actividade de Ineo e FEGAXE (Federación
Galega de Xoves Empresarios) celébrase no Pazo da Cultura de Pontevedra, entre
as 10.00 e as 14.00 horas. Será inaugurada por Lucía Gregorio, directora de
Ineo, e José Valenzuela, presidente de AJE Pontevedra. O seu obxectivo,
lembran, é promover o emprendemento en Galicia, achegándolles aos responsábeis
das novas iniciativas galegas de mercado todo tipo de recursos reais para facer
realidade as axudas e subministrándolles a posibilidade de sentar, cara a cara,
cos representantes das entidades financeiras co fin de resolver as súas dúbidas
concretas.
Precisamente esta posibilidade de celebrar
mesas de traballo cos membros das entidades será un dos puntos máis salientábeis
do taller, informa Ineo. Para dar corpo a esta liña de traballo, participarán
na actividade Ángel Álvarez Prego, director de
Empresas para as provincias de Pontevedra e Ourense do Banco Sabadell, e máis un
representante de Novagalicia Banco, ámbolos dous achegando a súa experiencia
persoal para a resolución de consultas acerca de cuestións como o que teñen en
conta os bancos para conceder créditos e capital que axuden á posta en marcha
dunha empresa.
A xornada tamén contará
coa presenza de Guillermo Viña, xerente de IgapeNova, e Juan Manual Cividanes,
director xeral de XesGalicia, así como dun representante da Consellería de
Traballo. Xuntos darán forma a un relatorio colectivo sobre axudas para as
iniciativas de mercado en Galicia. Asemade, Emilio Iglesias, coordinador
nacional de Eureka, adxunto ao CDTI, e Ana Martínez, técnico da Área de Xestión
Mediación do ICO, abordarán os apoios a nivel nacional. Asemade, o Consello
Galego de Cámaras tamén liderará un relatorio sobre As Claves para atopar capital.
O obradoiro que organizan
Ineo e FEGAXE está dirixido sobre todo “a
estudantes que se estean a propor o emprendemento como saída profesional e a
profesionais que teñan vocación emprendedora”.
A asistencia á xornada é
aberta, de balde para socios de Ineo e FEGAXE, e cun custe de 40 euros máis IVE
para non asociados. A inscrición debe formalizarse chamando ao teléfono 986 112
570 ou enviando un correo electrónico indicando nome e apelidos da persoa que
asiste así como os datos de contacto e a empresa á que pertence. Ineo insire o obradoiro na súa arela de
fortalecer o sector TIC da nosa terra, pondo ao seu alcance formación
especializada e asesoramento para a posta en marcha de iniciativas que marquen as diferenzas, permitíndolle
ao noso tecido tecnolóxico-dixital seguir medrando.