Ineo celebra o seu décimo aniversario impulsando Talento.gal e presentando nova directiva
venres, 7 de outubro do 2016
A iniciativa Talento.gal,
posta en marcha pola asociación Ineo,
desenvolve dende onte o seu foro networking. O encontro, que
se celebra hoxe tamén, ten o seu centro de operacións na sede de
AFundación en Vigo. O evento vén da man de Ineo co apoio IGAPE e
serve de apertura aos actos de celebración do décimo aniversario da
dita asociación de empresas TIC. O obxectivo de Talento.gal e do
foro que lle serviu de face visíbel e presentación foi xerar
sinerxías e abrir vías de colaboración de alto nivel entre o
tecido empresarial galego da área tecnolóxica e profesionais
galegos asentados no estranxeiro que traballan nas principais
compañías internacionais do sector.
Na cita deste xoves
participou o conselleiro de Economía, Francisco Conde, así como
representantes institucionais e do empresariado. Os actos serviron
tamén como presentación da nova xunta directiva de Ineo, na que
Giovanni Giardina toma a substitución de Carlos Conde á fronte da
sectorial tecnolóxica galega.
Durante a súa
intervención, o conselleiro agradeceu ao presidente saínte da
asociación, Carlos Conde, a adicación que demostrou á hora de
liderar a entidade, que ten “como principal obxectivo a defensa
dos dereitos e intereses do sector TIC”. Ao mesmo tempo, o
conselleiro en funcións felicitou ao novo presidente de Ineo, a quen
convidou a seguir dar continuidade á aposta a prol da innovación
que caracterizou o traballo da asociación ao longo desta década de
actividade. Asemade, Conde aproveitou para salientar “o importante
peso” que representa o tecido tecnolóxico-dixital en Galicia.
Nesta liña amosouse
tamén o novo presidente de Ineo, Giovanni Giardina, que destacou “o
bo facer das firmas do sector TIC galego”, e dixo que “temos que
estar orgullosos delas, xa que o seu traballo sempre é sinónimo de
garantía e de calidade, de saber facer produtos e servizos e de
grandes profesionais”. Giardina tamén lembrou os principais retos
de Ineo para esta nova andaina que comeza, entre os que se conta o de
seguir fomentando “un sector galego forte, que sexa quen de
competir a nivel internacional, de colaborar para atender de maneira
axeitada as necesidades dos clientes dándolles unha resposta
integral, de xerar postos de traballo que absorban os excelentes
titulados que se forman nas nosas universidades e, sobre todo, de
contribuír ao benestar xeral da Comunidade”.
Giardina tamén fixo
fincapé na importancia de iniciativas como Talento.gal, dirixidas ao
amosar, visualizar e aproveitar as altas capacidades dos nosos
profesionais no mundo (especialmente potentes no sector tecnolóxico),
a xeito de rede de contactos de alto nivel para as nosas empresas”.
Giardina engadiu que “foi a experiencia de Ineo a que permitiu
abrir estas canles de colaboración e pór en marcha esta
iniciativa”.
Talento.gal
Talento.gal, cuxa
primeira xornada de traballo continuará hoxe venres 7 de outubro
(tamén en AFundación de Vigo, na rúa Policarpo Sanz), permitiu
reunir en Vigo un total de 16 profesionais galegos que traballan no
estranxeiro ocupando postos destacados en empresas tecnolóxicas de
referencia a nivel internacional como Microsoft, Warner Music,
Visa, Siemens, Orange, Cern, Telefónica USA ou Vasco Data Security,
entre outras.
Segundo informa Ineo,
moitos destes profesionais amosaron a súa disposición e interese en
establecer contactos coas nosas empresas. O obxectivo de Talento.gal,
polo tanto, céntrase en orientar a firmas establecidas na nosa terra
para que coñezan en que traballan os devanditos profesionais nas
súas respectivas compañías e que colaboracións poderían propor.
Segundo informa Ineo, “son moitos os eidos nos que se poderían
establecer sinerxías”. Por exemplo, sería viábel crear unha
porta de entrada a investigadores que buscan empresas para pór en
mercado as súas solucións, “xa que por esta vía abriríase un
camiño para chegar a firmas de terceiros países con moito máis
percorrido neste ámbito”. Ineo tamén salienta as posibilidades
dos programas destas compañías internacionais para estimular o
emprendemento nos seus traballadores, identificando proxectos nos que
investir ou facilitando que os seus empregados adiquen parte da súa
xornada a asesorar outros emprendedores, “o que suporía unha
oportunidade para novos empresarios galegos”.
Talento.gal, que conta co
apoio do IGAPE, a Xunta ou os fondos europeos FEDER, é unha
iniciativa que busca abrir o seu propio proxecto a ouros axentes,
alén do empresariado. Abrirse, polo tanto, a universidades que
queiran manter o contacto cos seus alumnos, colexios
profesionais que desexen identificar onde están os seus profesionais
máis recoñecidos, administracións públicas que desexen facer
seguimento da circulación do talento, etc. En definitiva, “que se
converta nun observatorio do talento galego a nivel mundial e
nunha rede de intercambio de experiencias”.