Industria aproba os proxectos da II Fase do Programa de Extensión de Banda Ancha

O Ministerio de Industria, Turismo e Comercio, vén de resolver a convocatoria da fase II do Programa de Extensión da Banda Ancha en zonas rurais e ailladas que se enmarca no Plan Avanza e no Programa Operativo FEDER da Unión Europea en cooperación coas Comunidades Autónomas.
Tra-la convocatoria para esta segunda fase do programa, veñen de aprobarse novos proxectos para 14 Comunidades Autónomas entre as que se atopa Galicia e para as dúas Cidades Autónomas (Ceuta e Melilla). Esta nova fase vai beneficiar a un total de 2.781 municipios, 9.337 núcleos de población e case 1,2 millóns de cidadáns.
A cuantía das axudas ascende a 3.088.795 euros en subvencións e 16.197.026 euros en créditos reembolsables ós operadores seleccionados; e ademais, prevese que, para o periodo 2007-2008, as compañías realicen inversións de preto de 32 millóns de euros.
O obxectivo do Programa de Extensión de Banda Ancha é conseguir para o vindeiro ano 2008, a máxima dispoñibilidade deste servizo no territorio español, en condicións técnicas e económicas similares ás existentes na actualidade nas zonas urbanas, e todo iso, en coordinación con iniciativas análogas das Comunidades Autónomas.
Nas convocatorias do programa de 2005 e 2006 (fase I) xa se aprobara o proxecto en Galicia e noutras once Comunidades Autónomas máis, nas que preto de 6,5 millóns de habitantes poideron acceder ós servizos de banda ancha.
Estas dúas fases do programa, que concluirá en 2008, permitirán extender servizos de telecomunicacións de banda ancha a máis de 58.600 núcleos habitados nos que residen do redor de 7,6 millóns de persoas. Estes núcleos distribúense en 5.706 dos 8.108 municipios que existen en España e que non contaban ó inicio do programa cunha oferta suficiente de servizos de banda ancha.