Industria actualiza o emprego do espectro radioeléctrico
venres, 10 de maio do 2013
O Ministerio de Industria
aprobou
esta semana unha actualización do Cadro Nacional de Atribución de
Frecuencias (CNAF), que é o elemento que regula o emprego do
espectro radioeléctrico entre os distintos servizos de
radiocomunicacións (telefonía móbil, radio, TV, comunicacións por
satélite) nas diferentes bandas de frecuencia. A actualización
responde á necesidade de avaliar cada pouco as necesidades de
comunicación e as previsións de desenvolvemento de cada un dos
servizos, reservándolle os anacos de espectro que en cada caso
resulten axeitadas. “A súa actualización”, informa
Industria, “sitúase en liña coa Axenda Dixital para España,
que propón lograr un uso máis eficiente do espectro
radioeléctrico”.
Entre as actualizacións
realizadas atópase a previsión do uso da banda do dividendo
dixital, arestora empregada polo servizo de televisión, para a
prestación de servizos de comunicacións móbiles de banda larga, “o
que impulsará a implantación da telefonía móbil de cuarta
xeración no país”, sinala Industria. Asemade, ampliouse a
zona do espectro que se usa para transmitir en tempo real información
audiovisual en recintos públicos para producións multimedia,
actuacións artísticas e deportivas, “o que mellorará a
conexión e facilitará o uso de dispositivos como os micrófonos
sen fíos”, engádese. Por outra banda, esténdese a zona do
espectro denominada “de uso común”, que non require de
ningún tipo de autorización para o seu uso, “con novas bandas
de frecuencia e un maior catálogo de dispositivos e aplicacións que
poidan utilizalas”.
