Incautan o portátil dunha nena de 9 anos en Finlandia por descargar música da Internet
xoves, 22 de novembro do 2012
Se pensabamos que en España a SGAE tiña mala sona polas súas
prácticas recadadoras que algúns cualificaban como mafiosas, parece que en Finlandia a entidade homóloga, a TTVK, está a chegar a niveis que van
ferir de morte a súa reputación a nivel global, pois vén de facerse público
unha actuación realmente escandalosa de abuso pola súa banda. Os feitos
remóntanse a outubro de 2011, cando unha cativa dende o seu portátil buscaba
facerse co disco da cantante Chisu, chegando a parar a The Pirate Bay, onde
atopou o xeito de descargar os temas musicais sen pagar, o que provocou que a
TTVK contactase co pai da rapaza advertido da infracción do copyright e
ofrecendo rematar o conto tras o pagamento dunha compensación de 600 euros e o
asinado dun acordo de confidencialidade, ao que o proxenitor negouse, polo que
o pasado martes ás 8 da mañá recibiu a visita da policía no seu domicilio cunha
orde de rexistro e incautación de probas relativas á compartición de ficheiros
ilícita, incautando
o ordenador portátil de Winnie the Pooh
da cativa. Os axentes chegaron a comentar que “tería sido máis doado para todos se pagases a compensación”.
O pai da cativa tamén asegura que a suposta descarga efectuada pola súa filla
non funcionou, e tivo que mercarlle o disco de Chisu no seu día, polo que
resúltalle especialmente molesto que a TTVK actúe contra cidadáns con
independencia da súa idade ou de se adquiriron os contidos legalmente de xeito
paralelo ás descargas. Ao parecer, non teriamos escoitado falar antes destas
prácticas por parte da TTVK porque ata o momento terían rematado en acordos confidenciais,
e o feito de que agora non puidesen facer tal, e chegasen tan lonxe como para acosar
a unha nena, deixa en evidencia os abusos que poden xurdir dunhas leis que
antepoñen os dereitos das empresas aos dos cidadáns.
Dende Froiteiras Electrónicas (EFF) aseguran que estamos ante un bo exemplo do
lonxe que están a chegar as leis de protección do copyright e a falta de xuízo
de entidades de xestión e axentes da lei; mentres que representantes da
cantante Chisu aseguran a través de Facebook que os artistas e discográficas non teñen
ningún control sobre as actuacións que emprenden de xeito independente dende a
TTVK.