Imaxina Coruña premiou iniciativas para mellorar a accesibilidade e reducir a contaminación lumínica
luns, 15 de maio do 2023
A
Domus
da Coruña acolleu este sábado 13 de maio a fase final da segunda
edición do concurso escolar Imaxina
Coruña, certame do Concello (a través dos servizos
municipais de Educación e Museos Científicos) que pon a proba o
talento do alumnado de diversos centros educativos da cidade e a área
metropolitana, “contribuíndo á difusión da cultura científica e
tecnolóxica”.
A
rapazada de Secundaria levou a cabo novamente unha investigación por
grupos na busca de solucións a problemas reais da sociedade, desta
volta arredor da ciencia cidadá, Os IES Urbano Lugrís, IES David
Buján, CPE Compañía de María e CPR Esclavas do Sagrado Corazón
foron os centros educativos que chegaron á final do certame. O
alumnado presentou diversos proxectos, de temática variada,
orientados a avaliar a calidade de auga nas fontes, a contaminación
lumínica, a medición de CO2 nas aulas, a creación de mapas sonoros
da cidade e tamén lembranzas de edificios antigos.
No
contexto do desenvolvemento dos seus proxectos, o alumnado
participante contou coa colaboración do Centro de Supercomputación
de Galicia (CESGA), que elaborou unha aplicación para dispositivos
móbiles deseñada expresamente para a execución de proxectos de
ciencia cidadá no eido escolar.
O
xurado, integrado por Andrea Cadaveira, codirectora da Open Science
Cambre 2022 e directiva de Asociación Xuvenil Xentde100cia; Diego
Castro, gañador da Exporecerca Xove e do Water Prize España; María
José Malmierca, directora de e-learning do CESGA; José Viñas,
creador da Guía de Ciencia Cidadá da Xunta; e Patricia Barciela,
directora técnica da Domus, que actuou como secretaria, determinou a
listaxe de proxectos premiados:
-Premio
á Sustentabilidade: proxecto I-luminados,
do CPR Esclavas do Sagrado Corazón. O xurado destacou a importancia
de minimizar o impacto dos diferentes tipos de luz sobre os seres
vivos e a súa contorna.
-Premio
á Innovación: proxecto A que soa a cidade?, do
CPR Compañía de María. O xurado valorou a variedade e enfoque no
uso de aplicacións móbiles para a recollida e análise de datos.
-Premio
ao Compromiso Social: proxecto Coruña dos Coruñeses,
do IES Urbano Lugrís. O xurado subliñou a sensibilidade do alumnado
pola accesibilidade física e económica a unha enorme diversidade de
sitios da provincia da Coruña, asi como a elevada participación
cidadá na toma de datos.
As
rapazas e rapaces gañadores desta segunda edición de Imaxina Coruña
participarán na feira xuvenil Ztzienza Azoka de Bilbao. Neste
sentido, o concelleiro de Educación, Jesús Celemín, que tomou
parte no acto de entrega de premios celebrado na sala Leonardo da
Vinci, animou ao alumnado a seguir avanzando no desenvolvemento das
ideas presentadas na Domus.