Imaxin|software implanta o máis esixente modelo de calidade mundial

Nunha aposta sen igual pola calidade na súa estratexia empresarial, imaxin|software, unha entidade galega con ampla traxectoria na consultoría e no desenvolvemento de servizos e solucións software, implantou, neste último ano, o modelo de calidade CMMI nivel 3 para a mellora ou avaliación dos procesos de desenvolvemento e mantemento de sistemas e produtos de software.
A certificación do modelo de calidade CMMI foi unha aposta dentro do plano estratéxico desta firma e ten como finalidade implantar un proceso estandarizado de desenvolvemento de software que permita, entre outras cousas, obter produtos de calidade, mellorar a xestión dos proxectos para garantir o cumprimento dos prazos de entrega ao cliente e ser máis competitivos en produtividade.
Asemade, esta certificación, que lle permitirá a imaxin|software mellorar continuamente no seu proceso produtivo ata satisfacer todas as necesidades dos seus clientes, tamén posibilitará aplicar as técnicas e modelos de enxeñaría máis axeitados e innovadores de acordo coas tipoloxías de proxectos a desenvolver, así como mellorar os tempos de resposta ao cliente e ampliar o abano de solucións a aplicar en cada caso.
O proxecto de implantación foi desenvolvido dentro da plataforma Vindeira: Excelencia Tecnolóxica, unha ambiciosa iniciativa cun grande impacto no sector TIC que busca favorecer a mellora da competitividade das empresas galegas co obxectivo de “constituir un sector TIC consolidado”.
Esta iniciativa conta co financiamento do Ministerio de Industria, Turismo e Comercio a través do programa PROFIT así como coa colaboración da Consellaría de Innovación e Industria da Xunta de Galicia a través da propia plataforma Vindeira.