Imaginarium estrea o seu novo servizo de tratamento de imaxes en liña
venres, 12 de decembro do 2008
Imaginarium, a marca especializada en surtir aos Reis
Magos cos xoguetes favoritos dos máis cativos da casa, vén de lanzar un servizo de personalización fotográfica para que as familias poidan “deseñar, personalizar e decorar”
diferentes produtos coas súas fotos preferidas.
Os usuarios destes servizos non precisan descargar
ningún programa no escritorio do seu ordenador para acceder ao sitio e
rexistrarse xa que, ao entrar, a aplicación xera automaticamente un espazo
virtual que se converte na área de traballo, o que fai posible que os proxectos
se poidan personalizar dende calquera ordenador.
Os produtos que se poden adaptar aos gustos dos
cativos mediante esta nova ferramenta son: álbums, calendarios, blocs de notas,
pósters, postais e cadros, todos eles con opcións de tamaño, número de páxinas,
tipos de encadernación…distintos.
Os responsables da aplicación web aseguran que
crear este tipo de proxectos “é moi
doado, grazas á intuitiva interface da aplicación, que conta cunha gran
variedade de opcións de maquetación das fotografías, e un sinxelo sistema de inserción e retoque
de imaxes”.
A aplicación de Imaginarium caracterízase, sobre
todo, por ofrecer comodidade para traballar coas imaxes grazas a un manual de
uso moi visual que axuda a solucionar calquera dúbida e fai que sexa moi doado
facer as montaxes.
O usuario pode cargar tódalas fotografías que
precise para os seus proxectos dunha soa vez, sempre e cando non superen un Gb
e ademais, ten á súa disposición unha galería de ilustracións e imaxes
exclusivas coa que as familias poden “adornar
e dar un toque de maxín” aos seus deseños.
Unha vez finalizado o proxecto, o usuarios só ten
que engadilo ao “carro da compra” e
facilitar os seus datos de envío para recibilo nun prazo aproximado duns cinco
días.