Ilegalizan en Australia o PS Jailbreak

Pese a que hai anos un polémico xuízo en Australia considerou que chipear consolas de videoxogos era totalmente legal por servir para máis fins que piratear xogos, parece ser que tal decisión non sentaba un precedente coma moitos pensaban, pois cada caso ten as súas circunstancias, e despois de que Sony emprendese accións legais contra o fabricante do dispositivo USB que conseguiu desprotexer a seguridade da PlayStation 3, o PS Jailbreak, temos que non só ditouse un bloqueo temporal da distribución do produto, senón que a decisión xudicial parece consolidarse, e aínda que a batalla xudicial aínda non rematase, supón unha vitoria pírrica para Sony, que sae coa súa polo momento e emprende tamén accións legais contra outros revendedores do PS Jailbreak nos EE.UU.
Comentamos a temporalidade da vitoria de Sony porque actualmente xa hai varios clons do PS Jailbreak a piques de chegar ao mercado e incluso apareceu unha versión de código aberto que está a dar pé a múltiples solucións para liberar a PS3 a prezos reducidos, polo que entendemos que a consola de Sony vai ter que actualizar o seu firmware para evitar que estas novas técnicas afecten negativamente ás vendas dos xogos para súa plataforma, xa que non podemos esquecer que todas estas técnicas que liberan a PS3 fanse a través de USB, polo que moitos usuarios poden atreverse con elas por non precisar da apertura física da consola e os riscos que supón, aínda que cómpre destacar que as consolas modificadas poderán ser detectadas por Sony, de xeito que poderían quedar vetadas no xogo en liña, o que suporía un importante atranco, como tamén acontece co pirateo da Xbox 360.