Igalia convoca o segundo Premio ao Mellor Proxecto Fin de Carreira con Software Libre

A compañía galega do sector tecnolóxico, Igalia, vén de abrir o prazo de inscrición para participar na segunda edición do seu Premio ao Mellor Proxecto Fin de Carreira con Software Libre, dirixido a estudantes matriculados en calquera das tres universidades galegas.
Nesta convocatoria, a iniciativa de Igalia está avalada polo apoio das Universidades de Santiago, A Coruña e Vigo así como pola Consellaría de Innovación e Industria da Xunta de Galicia a través de Mancomún, o seu centro de referencia e servizos de software libre.
Este galardón ten como finalidade tratar de fomentar o achegamento e o coñecemento dos universitarios galegos ao software libre, así como promover o seu emprego de calidade baseado no uso das tecnoloxías da información e as comunicación.
Ao premio poden concorrer estudantes de calquera titulación que cimenten o seu proxecto fin de carreira, realizado entre febreiro e outubro de 2008, nun novo desenvolvemento baseado en software libre ou que melloren un programa xa existente.
O prazo de inscrición manterase aberto ata o vindeiro 31 de outubro e pode conformarse na web de Igalia, a través desta ligazón, ou ben a través desta outra na web de Mancomún.
O xurado, integrado por expertos de Igalia, das tres universidades galegas e de Mancomún, determinará cal é o mellor proxecto fin de carreira de entre tódolos presentados ao concurso e este será obsequiado cun premio de 1.000 euros en efectivo.
Asemade, de considerarse oportuno, o mesmo xurado poderá conceder un accésit de 500 euros a outro proxecto finalista.