INEO expón o día 19 en Vigo diversos recursos para mellorar o uso das TIC no traballo

Unha imaxe máis frecuente do que se podería supoñer: un traballador xogando ao solitario no seu computador

Temos á vista novo Foro de INEO, desta volta coa optimización no manexo das TIC dende o noso posto laboral como eixe temático a desenvolver. A cita será o vindeiro martes 19 de xuño, en Vigo, e contará coa presenza de José María Lozoya Pérez, socio do bufete de avogados Lozoya e Torres, especializado en Dereito ligado ás novas tecnoloxías da información. O foro, titulado O control do uso das TIC no traballo, dará comezo ás 17.00 horas, na sala Galicia da sede da Confederación de Empresarios de Galicia, CEP, en Vigo.
Un dos obxectivos básicos do relatorio é axudar aos profesionais a estaren no lado positivo e rendíbel das TIC en materia de optimización de tarefas. Ou sexa, que o que se pretende é evitar o mal uso das tecnoloxías, unha das cuestións que, por certo, máis preocupa ás empresas de hoxe. De feito, segundo indica INEO (facéndose eco dos últimos estudos ao respecto de INTECO), hai que ter en conta que o 62% das fuxidas de información das PEME prodúcense debido a erros no emprego destas ferramentas. Asemade, sinala a asociación, cómpre que asumamos a importancia de ter a mellor actitude posíbel e os mellores hábitos para acadar unha protección axeitada dos nosos datos. “De non tomarse medidas como o uso de aplicacións e sistemas operativos para evitar vulnerabilidades, copias de seguridade, uso responsábel e prudente do correo electrónico e a descarga de ficheiros, o grao de seguridade informática dunha empresa pode verse moi reducido”, informan dende INEO.
O relatorio de José María Lozoya Pérez tamén servirá para abordar outra cuestión de gran interese: o debate aberto arredor do grao de control que se pode establecer no ámbito de traballo e, máis polo miúdo, de que maneira se debe delimitar o seu alcance para artellar control empresarial e respecto aos dereitos dos traballadores. “É o caso”, engádese dende INEO, “da aplicación do réxime disciplinario axeitado cando se produce un uso non axeitado de Internet ou dunha conta de correo electrónico”.
Lozoya Pérez estará acompañado no foro de Lucía Gregorio e Jorge Cebreiros, directora xeral e presidente de INEO, que intervirán na apertura e na clausura do evento, respectivamente.
A asistencia ao encontro profesional é de balde para socios de INEO e ten un custe de 40 euros máis IVE para non asociados. A reserva da praza pode facerse no teléfono 986 11 25 70 ou enviando un correo electrónico a administracion@INEO.org. Na páxina web da asociación temos á nosa disposición un documento en PDF co programa específico de contidos.