INECO achegará asesoramento e formación dixital nos nove concellos galegos beneficiados de RuralTIC
mércores, 21 de setembro do 2022
O
delegado do Goberno en Galicia, José Miñones, debullou este 21 de
setembro os detalles do programa estatal INECO-RuralTIC,
que vai beneficiar o proceso dixitalizador de nove concellos galegos
de menos de 10.000 habitantes. Trátase, dixo, dun programa pioneiro
da empresa INECO, dependente do Ministerio de Transportes, Mobilidade
e Axenda Urbana. José Miñones enmarcou este anuncio no compromiso
do Goberno de España coa cohesión territorial e coa igualdade de
oportunidades do conxunto da poboación, “con independencia de onde
resida”.
José
Miñones lembrou que o Goberno, a través de distintos ministerios,
está a “impulsar programas de dinamización rural e ferramentas
para diminuír as fendas entre as cidades e os pobos, favorecer a
cohesión territorial e a igualdade de oportunidades e frear o
despoboamento do rural”, co obxectivo de facer que “vivir nos
pequenos concellos sexa un privilexio e non unha traba para crear un
proxecto de vida, de traballo ou de formación”.
O
delegado sinalou que en Galicia son nove os concellos beneficiados,
nos que residen máis de 24.000 persoas en conxunto. Na provincia da
Coruña, as entidades locais seleccionadas son Cerdido, Porto do
Son e Vimianzo; na provincia de Lugo, o concello de Trabada,
e na provincia de Ourense, os concellos de Carballeda de Avia,
Cortegada, A Gudiña, Parada de Sil e A Pobra de Trives.
En total, seleccionáronse 50 concellos no conxunto de España para
esta iniciativa das comunidades de Andalucía, Asturias, Aragón,
Castela León, Castela A Mancha e Galicia.
Esta
aposta pioneira levará a estes concellos a persoal do INECO, que,
segundo lembrou Miñones, adicará unha parte da súa xornada laboral
a prestar os labores de asesoramento e formación do programa. “A
fórmula deseñada pola compañía permitirá aos profesionais que
formen parte da iniciativa desprazarse temporalmente a estas pequenas
poboacións para compaxinar o teletraballo coa realización de
talleres formativos en dixitalización social e económica”,
sinalou, engadindo que “a través deste formato de colaboración,
os participantes de INECO dedicarán ata un 20% da súa xornada
laboral a estas accións, mentres que os concellos achegarán as
estadías durante os días laborais do período de desenvolvemento do
programa”. Cada estadía terá unha duración inicial de dúas
semanas, prorrogábeis outras dúas.
Os
obradoiros serán de formación no uso das novas tecnoloxías á
poboación de máis idade ou asesoramento ás pemes locais, entidades
ou asociacións, para potenciar o seu posicionamento dixital,
mellorando ou creando webs, incrementando a súa presenza en redes
sociais ou deseñando aplicacións móbiles que optimicen a
actividade, entre outras iniciativas.