IBM lidera a listaxe de patentes por vixésimo primeiro ano consecutivo
mércores, 15 de xaneiro do 2014
IBM
vén de dar a coñecer os seus datos máis recentes en materia de
creación de tecnoloxía. A multinacional da informática obtivo unha
nova cifra marca de 6.809 patentes en 2013, o que lle supón liderar
un ano máis a lista de rexistro de patentes nos Estados Unidos. “Con
esta nova marca”, sinalaron os responsábeis de IBM, “levamos 21
anos consecutivos liderando a devandita clasificación”. Segundo
engadiron, as patentes de 2013 son relativas a innovacións de
diferente índole que axudarán á compañía a liderar áreas
estratéxicas. Un exemplo disto é IBM
Watson, servizo de informática na nube e analítica de grandes
datos.
Ademais, estes achados
diríxense a “impulsar a chegada da computación cognitiva”,
sinalou a multinacional no seu informe, un estado de cousas (o da
computación cognitiva) que se vai caracterizar pola capacidade das
máquinas para aprender, razoar e interactuar coas persoas de xeito
natural. A xuízo de IBM, as patentes son só “un dos indicadores
da innovación”, sendo igual de importante a pegada que esas
innovacións teñen cando se empregan para crear solucións que
axudan ás empresas a solucionar problemas.
En 2013 o número total
de patentes de IBM foi superior á suma de todas as rexistradas ese
mesmo ano por Amazon, Google, EMC, HP, Intel, Oracle/SUN e Symantec.
O liderado de IBM foi posíbel, fixo saber a compañía, grazas ás
innovacións de máis de 8.000 científicos de 41 países diferentes.