Hostaleiros galegos opóñense ó canon da SGAE

Os hostaleiros galegos están a pechar filas en contra do canon da Sociedade Xeral de Autores e Editores (SGAE). Así o fixeron saber estes días nun comunicado de prensa até 2.258 empresarios pertencentes á Federación de Profesionais e Autónomos de Galicia, OAP-Galicia, e á Asociación Sectorial de Hostalaría da Provincia de Pontevedra, HOSA. Todos eles coinciden neste punto: na crítica aberta ás taxas que a devandita sociedade de xestión lles está cobrar pola recepción de programas emitidos en aberto en televisión e radio nos seus locais.
Ó seu xuízo, a taxa non ten razón de ser, posto que xa foi previamente abonada polos medios de comunicación. O caso é que a petición dos hostaleiros galegos, que non é nova, non ten que ver co pagamento dos dereitos de autor pola música reproducida nos seus establecementos, pago ó que non se negan. A súa crítica vai directamente dirixida ó pagamento das taxas por contidos emitidos en tv e radio: “Defendemos o emprego destes aparellos como algo lexítimo partindo da base de que non existe ningunha razón coherente para pagar polo uso dun sinal público que circula libremente pola nosa xeografía”, comenta José Conde, presidente de OAP-Galicia no comunicado devandito.