Gradiant métese de cheo na loita contra as doenzas raras
mércores, 21 de maio do 2014
Xa o avanzabamos hai uns
días: o centro tecnolóxico Gradiant está a introducirse de cheo
nun ámbito de investigación para o que ten moito que achegar.
Falamos
do ámbito da información xenética. Daquela fixemos fincapé en
datos xerais, salientando que o traballo dos investigadores de
Gradiant centraríase en boa medida en estudar ferramentas que axuden
a atopar e clasificar as variantes de meirande interese e potencial
clarificador entre a inxente cantidade de información que guindan as
análises a gran escala da secuencia do ADN. Agora, Gradiant fornece
máis datos ao respecto, engadindo
que o traballo no devandito ámbito xa comezou e que o reto de
verdade é “localizar, manexar e avaliar a información relevante”.
No punto de mira está
axudar ás persoas con doenzas non estendidas, enfermidades raras que
afectan a menos de cinco persoas por cada 1.000 habitantes e que
teñen a súa raizame, na meirande parte dos casos, en cuestións
xenéticas. Neste senso, o centro tecnolóxico galego considera que
para comezar a afrontar de verdade estas doenzas e os seus remedios,
cómpre superar unha serie de atrancos. Atrancos que están presentes
nas novas técnicas de secuenciación masiva de ADN (chamadas NGS,
Next Generation Sequencing),
“que por unha banda favoreceron un incremento exponencial no
volume de datos que están a disposición dos especialistas en
xenética pero que pola outra achegan un desafío complicado de
superar, que é como conseguir facérmonos coa información de
verdade relevante de entre todos estes datos masivos, ademais de
aprendermos a utilizala”, sinalan fontes de Gradiant. Trátase dun
pescozo de botella que só se poderá ampliar con técnicas novas de
xestión e análise do coñecemento xerado.
Segundo este fío,
Gradiant informa que os seus investigadores están a estudar a día
de hoxe o uso de novos algoritmos de cálculo para descubrir
mutacións xenéticas, así como integralos nun sistema de análise
para facilitar aos especialistas o diagnóstico de enfermidades
raras. “O reto”, lembra o centro tecnolóxico, “é localizar,
manexar e avaliar a información relevante”. Ou sexa, conseguir
separar as variantes xenéticas que están ou poderían estar
vinculadas a este tipo de enfermidades das que son irrelevantes,
sempre dentro dun enorme conxunto de datos.
Estes traballos estanse a
levar a cabo dende a área de eHealth do centro tecnolóxico galego,
coordinados polas investigadoras Helena Fernández (responsábel da
dita área) e Lorena González. Segundo indican, “o uso de
algoritmos baseados en recoñecemento de patróns para clasificar a
información xenética podería significar un enorme avance na loita
contra as enfermidades raras”.