Gradiant foi alén dos 18 millóns de euros en vendas de innovación
luns, 27 de febreiro do 2017
- Luis Perez Freire, director xeral de Gradiant, e Jorge Munir El Malek Vazquez, director da area de Comunicacións Avanzadas de Gradiant durante a presentación
O
Centro Tecnolóxico Gradiant
presentou hoxe as súas cifras de facturación. Na convocatoria cos
medios de prensa, na que tamén se presentou a máis recente
tecnoloxía desenvolvida no centro galego, LifeSensor, fíxose
fincapé en que Gradiant foi quen de superar os 18 millóns de euros
en vendas de innovación a un total de 161 empresas. Máis polo
miúdo, acadou en 2016 os 18,6 millóns de euros en vendas de
innovación, logo de oito anos de actividade. Desta cantidade xerada,
o 55% concentrouse en empresas privadas, con clientes e socios en
dúas ducias de países. Na cita de hoxe tamén se fixo saber que en
2016 obtivo unha marca de ingresos procedente do estranxeiro, cun 21%
da súa facturación.
Por
outra banda, informouse de Estados Unidos e Reino Unido foron os
principais mercados internacionais, e de que unha firma especializada
en seguridade e saúde do segundo dos devanditos países vén de
iniciar os ensaios do Sensor de Vida, LifeSensor, unha das últimas
innovacións de Gradiant, que permite previr e evitar o falecemento
de persoas en lugares pechados.
Gradiant
fixo saber que o proxecto LifeSensor comezou en 2017 a súa fase de
probas en celas de custodia policial. En termos máis concretos,
posibilita o seguimento do ritmo respiratorio e movemento do paciente
“de maneira non invasiva”, optimizando a vixilancia a partir dun
sistema radar que detecta a existencia ou ausencia de respiración.
O
Centro Tecnolóxico engadiu no acto, no que participaron Luis Pérez
Freire (director xeral de Gradiant) e Jorge Munir El Malek Vázquez
(director de Comunicacións Avanzadas de Gradiant) que o dispositivo
LifeSesor dispón de alarmas en tempo real para avisar de “calquera
interrupción significativa” da respiración e coñecer en todo
intre o estado dun paciente que teña dificultades para ser
controlado con sensores. “O Sensor de Vida”, explicaron, “está
especialmente pensado para o control de persoas en situación de
vulnerabilidade, como os pacientes de hospitais psiquiátricos e
xeriátricos, aínda que tamén permite controlar outros procesos
como, por exemplo, a apnea do sono”.
Tamén
engadiron que a tecnoloxía de radiofrecuencia empregada dispón dun
alcance de detección de até seis metros, “mesmo a través de
materiais como roupa ou sabas, pero tamén madeira, pedra ou
cemento”. Por último, lembraron que ten capacidade para ser
carrexado por drons, “ampliándose as súas prestacións cara a
outras áreas como a procura e rescate de sobreviventes en
catástrofes naturais”.
249
proxectos
Na
convocatoria de hoxe informouse tamén de que durante o últimos oito
anos, Gradiant desenvolveu 249 proxectos diferentes de I+D+i,
converténdose “nun dos principais motores da innovación en
Galicia”. Asemade, engadiuse que a tecnoloxía do Centro
Tecnolóxico galego é empregada xa en “ámbitos tan diversos como
na aplicación móbil de banca en liña dun dos maiores bancos de
España” ou no da ciberseguridade, coa recente venda do seu sistema
de rastrexabilidade de documentos a Eleven Paths, a unidade de
ciberseguridade de Telefónica.