Gradiant aplica Intelixencia Artificial na mellora da fertilidade ovina
xoves, 28 de setembro do 2023
O Centro Tecnolóxico Gradiant,
referente
en tecnoloxías de telecomunicación con
potencial para as
empresas, vén de empregar a Intelixencia Artificial (IA) de cara a
mellora na fertilidade aplicada ás gandarías ovinas.
Máis polo miúdo, mediante o grupo de traballo GC4SHEEP
recompílanse, de maneira conxunta e nunha plataforma federada
segura, datos de cada unha das razas para o desenvolvemento de
modelos preditivos, permitindo a análise de solucións innovadoras
para mellorar a fertilidade por inseminación artificial e aumentar
así a rendibilidade das explotacións.
Así, a proposta de Gradiant, como parte do grupo de traballo
GC4SHEEP que permite aplicar IA para a mellora da fertilidade das
gandarías ovinas leiteiras, ten un dobre obxectivo: incrementar a
rendibilidade a través dunha transformación baseada no dato e a
posta en común da información con innovacións en mellora da
fertilidade.
O sector ovino de leite e as súas asociacións levaban anos
recompilando datos relacionados coas diferentes razas que supoñen
unha fonte moi valiosa de información, pero que até agora non
compartían entre si. GC4SHEEP permite crear unha plataforma federada
segura “dotada de Intelixencia Artificial” que facilita a posta
en común da información para o desenvolvemento de modelos
preditivos cos que as asociacións gandeiras ovinas poden tomar
decisións e actuar con maior celeridade.
Joaquín Lago de Gradiant sinala que “as novas tecnoloxías de
tratamento de datos acompañadas de Intelixencia Artificial
permitirán aos propietarios das explotacións gandeiras traballar de
xeito coordinado para identificar patróns e solucións en eidos como
o da fertilidade en inseminación artificial tendo en conta factores
como a xenealoxía, a alimentación ou a análise do leite, entre
outros”.
A iniciativa está liderada por OVIGEN, Centro de Selección e
Mellora Xenética de ovino e caprino de Castela e León, e conta na
agrupación con tres asociacións que representan case a totalidade
do ovino a nivel nacional (ASSAFE, AGRAMA e CONFELAC).
Indo á idea en cuestión,trátase dunha análise de solucións
innovadoras para mellorar a fertilidade. A través das tecnoloxías
desenvolvidas por Gradiant, pódense extraer datos de interese
vinculados á análise dos ritmos de saltos dos machos, de maneira
que se poida saber cal é o ritmo máis axeitado para manter a
produción de doses seminais de mellor calidade.
Grazas á plataforma de información compartida entre razas, tamén
se poden pór en común puntos fundamentais como a selección de
sementais en relación con estudos de morfoloxía, tamaño testicular
ou calidade do seme.
Os desenvolvementos de Gradiant baseados en Intelixencia Artificial,
permiten ademais estudar datos relacionados coas racións
alimentarias nas femias, para definir o plan óptimo para o
desenvolvemento fisiolóxico da ubre e, no caso dos machos, avaliar o
efecto da dieta no seu perfil como sementais.
Noutra liña, empregaranse os datos de análises MIR (Metodoloxía de
Infravermello medio) dos compoñentes do leite para determinar
correlacións con outros parámetros que inflúen na fertilidade, así
como a condición corporal das femias a inseminar, co obxectivo de
avaliar os resultados reprodutivos.