Gradiant achegará a súa experiencia no pulo europeo á tecnoloxía móbil do mañá: a tecnoloxía 5G
luns, 4 de novembro do 2013
Acontece en materia de
Sociedade da Información que cando unha tecnoloxía chega finalmente
ao usuario resulta que en certa maneira xa non é cen por cen nova.
Isto pasa con todo o que nos poidamos imaxinar: a cadea de
desenvolvemento e implantación é tan longa que cando se completa xa
deu tempo a que comezaran outras cadeas. Isto vén a conto para falar
de novo do centro
Gradiant e dos seus traballos e investigación TIC, algúns dos
cales están moi por diante do que se coñece e se usa a nivel xeral
(Gradiant traballa dándolle forma ao futuro). Este luns mesmo,
soubemos dun proxecto destas características no que colabora o
centro galego: a plataforma tecnolóxica europea de telecomunicacións
que pilotará a transición cara aos futuros sistemas 5G (a orixe do
vindeiro organismo que pilotará a implantación destas redes, que
complementarán e substituirán ás 4G, arestora en proceso de
despregamento na nosa terra).
A nova plataforma, que
aínda non ten nome oficial, aglutina a ISI (plataforma de
comunicacións por satélite) e a Net!Works (redes e servizos), que
se fusionaron nesta nova entidade que agora nace. E Gradiant, que até
agora era xa membro de ámbalas entidades, decidiu continuar coa súa
aposta internacional e formar parte da nova plataforma tecnolóxica
desde a súa fundación. “Este novo ente”, informan fontes do
centro galego, “estará formado por grandes empresas, PEME e
organismos investigadores de todo o continente, de modo que recolle a
todos os intereses do sector das telecomunicacións en materia de
I+D+i.”.
Nun futuro inmediato,
engádese, a plataforma terá un alto protagonismo a nivel europeo,
entre outras cousas porque é o xermolo do partenariado
público-privado para a futura infraestrutura 5G, que se prevé
que empezo a operar a principios de 2014. Esta alianza
pública-privada representa en palabras de Gradiant “unha aposta
estratéxica da Comisión Europea e do sector europeo das
telecomunicacións, mediante a que se favorecerá a competitividade
da industria da Unión á hora de definir as comunicacións e a
Internet do futuro”.
O apoio da Comisión
Europea á 5G canalizarase a través do novo programa marco de
investigación e innovación, Horizon 2020. A xornada fundacional
desta plataforma, celebrada en Bruxelas, serviu tamén para celebrar
as eleccións á primeira xunta directiva, que contará coa presenza
da compañía galega Quobis e de dous centros de investigación
españois, IMDEA Networks e Centre Tecnológic de Telecomunicacions
de Catalunya (CTTC).