Google permitirá que os clientes do seu servizo AdWords se anuncien en 800 cadeas de radio

Seguen a medrar a posibilidades de Google, e desta vez tócalle ó paquete de servizos para os clientes de AdWords, que en breve (prevese que antes de que remate 2006) poderán publicitarse en emisións radiofónicas.
O proxecto en cuestión chámase Google AdWords Audio e, como dixemos, trátase dun servizo que axuda ós internautas a anunciarse máis e mellor, e non só na Rede, senón a través das máis de 800 cadeas de audio que abranguen aproximadamente a tres cuartas partes do territorio de Estados Unidos. Nesta iniciativa, Google –basicamente– asume o papel da canle entre os usuarios de Adwords e as emisoras, incluíndose no pacto a posibilidade de empregar un estudo dixital para rexistrar os espazos publicitarios.
O buscador tamén interpretará outro papel: o de árbitro, decidindo a orde das cuñas e o intre do día máis axeitado para lanzar cada unha, entre outras cousas.