Google mellora o seu buscador de blogs

Google conta dende hai tempo cun buscador especializado en blogs, que vén de incorporar varias novidades que poden ser de grande utilidade para os seus usuarios, coma o feito de que as consultas que fagamos poden xerar un fluxo RSS ou Atom con resultados de busca, o que resulta de grande utilidade para subscribirnos aos mesmos dende lectores de feeds coma Google Reader e así estar ao tanto das novidades que se comenten na blogosfera sobre os temas do noso interese, ou incluso poden engadirse os resultados actualizados á nosa páxina en iGoogle a través dun gadget.
Amais tamén incorporaron unha sección coas consultas máis activas no buscador de blogs e outra coas últimas entradas en certos blogs populares. Estas novas seccións poden servir para achegar información de máxima actualidade ou para descubrir novos espazos, pero polo momento estas características están pouco maduras, e nin sequera discriminan os elementos publicados por categorías, polo que a súa utilidade é moi limitada.