GisEIEL, a solución do CITIC para as deputacións e concellos
mércores, 12 de febreiro do 2014
Dende hai anos as deputacións están obrigadas a cumprir coa Enquisa
de Infraestruturas e Equipamentos Locais (EIEL). A Deputación da
Coruña e os concellos que conforman a provincia recorreron a unha
aplicación do CITIC para a
correcta explotación e mantemento de todos os datos que se recollen
na enquisa, segundo apunta o centro galego “unha óptima solución
que empezaron a empregar outros organismos”. Lembrar que a
Enquisa de Infraestruturas e Equipamentos Locais (EIEL) é o
instrumento básico de análise das necesidades das deputacións a
efectos de cooperación económica local do Estado, unha ferramenta
fundamental para estes organismos que ten que elaborarse cunha
metodoloxía común.
Dende o ano 2008, a Deputación da Coruña decidiu empregar unha
aplicación propia baseada en software libre para a súa correcta
explotación chamada gisEIEL, desenvolvida polo Área Tecnolóxica de
Sistemas de Información Xeográfica do CITIC. A ferramenta gisEIEL
proporciona tres funcións básicas: recoller información, traballar
con ela e poñela a disposición do Ministerio e dos municipios.
Facilita todas as ferramentas necesarias para a análise, a xestión
e a validación da Base de Datos Territorial da EIEL, incluíndo a
impresión de cartografía e informes, “o que supón todo un avance
en relación a outras aplicacións de GIS do mercado, xa que agrega
unha maior cantidade de información”, sinala o CITIC. De feito,
engade, “o territorio é unha boa base para integrar datos de
distintos servizos e inclúense vías, equipamentos, redes de
abastecemento e saneamento”. En total dispón de 150 capas de
información, cunha media de máis de 20 variables por capa e con
filas de datos que superan os 20.000 como é o caso dos treitos de
estrada.
Entre os beneficios que achega atópase a axilidade das operacións
de inserción e edición da información asociada. Segundo Miguel R.
Luaces, Investigador Principal do Área Sistemas de Información
Xeográfica do CITIC e responsable do proxecto, “a aplicación é
válida para todo tipo de usuarios, non é necesario que sexan
expertos no manexo deste tipo de aplicacións. gisEIEL facilita a
creación e modificación de cartografía mediante ferramentas de
dixitalización avanzadas, así como a consulta e análise da
información mediante formularios personalizados, xeoprocesos e
ferramentas de xeración de cartografía e informes”.
Exportado fóra de Galicia
A aplicación gisEIEL incorpora ferramentas desenvolvidas
especificamente para a realización da EIEL. Entre elas atópanse as
ferramentas de conectividade que permiten calcular de xeito
automático as asociacións de servizo entre os elementos que
compoñen as redes de abastecemento e saneamento e os núcleos de
poboación enquisados; as ferramentas de cálculo automático de
campos, que posibilitan o cálculo automático de campos derivados a
partir da información enquisada e operacións espaciais e
alfanuméricas como vivendas ou rúas con déficit de alumado; ou o
módulo de validacións que fornece mecanismos que permiten comprobar
que os datos son correctos e cumpren coas restricións de datos
indicadas, previo envío ao Ministerio.
Estas características permitiron que gisEIEL esperte o interese
doutras deputacións, polo que ademais de na Coruña iniciouse o seu
uso en Ourense, Córdoba e no Consell Insular de Mallorca mediante a
sinatura dun convenio de cooperación interadministrativa. Ademais,
por ser software libre, tamén a Deputación de Pontevedra empregouno
como base para a aplicación que usa para cumprimentar a enquisa.
Polas súas características e beneficios, gisEIEL establécese como
unha das mellores solucións informáticas para as enquisas que han
de cumprimentar cada ano as deputacións. Completa, de sinxelo manexo
e con ferramentas específicas que non presentan o resto de
aplicacións. Ademais, o seu deseño flexible e modular permite a súa
adaptación rápida a outras necesidades como a xestión de
inventarios de bens, a xestión de plans urbanísticos, ou a
implantación dun sistema de información xeográfica corporativo.