Galvintec avoga por impulsar a transformación dos comercios de proximidade para garantir a súa supervivencia
xoves, 30 de novembro do 2023
O
comercio de proximidade ten que transformarse tecnoloxicamente se
quere ser viábel e competitivo. Esta foi unha das mensaxes achegadas
este mércores 29 de novembro por Moisés Mateo, director executivo
da empresa galega Galvintec, firma tecnolóxica de Grupo Alvariño. A
sesión, desenvolvida na sede pontevedresa de Afundación, encadrouse
nas xornadas hubNet da Cámara de
Comercio de Pontevedra, Vigo e Vilagarcía (ciclo Constrúe o
teu futuro na era dixital). O relatorio desenvolveuse baixo o
epígrafe O comercio de proximidade, cara a unha transformación
dixital. “Calculamos que en 2023 o 10% dos que non están
dixitalizados fracasarán e extinguiranse”, indicou.
Por
tanto, dixo, “a transformación dixital non é unha opción, senón
unha necesidade imperante para os comercios que desexan seguir sendo
relevantes nun mercado que cambiou radicalmente, polo que é
importante adoptar novas tecnoloxías, integrar sistemas de xestión
en tempo real e comprender os cambios sociolóxicos nos hábitos de
consumo”. Con exemplos de éxito concretos, mostrou aos presentes
como industrias enteiras tiveron que “reinventarse ante a
revolución dixital”, expoñendo ademais os perigos aos que se
enfrontan os comercios de proximidade que, sen unha estratexia
dixital clara, poden estar condenados a desaparecer.
Desde
Galvintec, a mensaxe é clara: unha chamada á acción para
comerciantes e empresarios para engancharse á transformación
dixital como aliada na mellora da experiencia do cliente e a
supervivencia do comercio local.
Co
ciclo de xornadas Constrúe o teu futuro na era dixital a
Cámara de Comercio Pontevedra, Vigo e Vilagarcía de Arousa
envórcase coa transformación dixital das pemes e o emprendemento a
través da iniciativa dixital hubnet. O programa inclúe un total de
9 eventos, entre conferencias, seminarios e xornadas técnicas, que
se celebran estes días en Vilagarcía de Arousa e Pontevedra e que
están dirixidos a sectores estratéxicos en Galicia: forestal,
transporte e loxística, turismo e comercio polo miúdo.