Galiza Ano Cero presenta nova web e comeza a súa primeira tempada de emisión
luns, 14 de outubro do 2013
Galiza Ano Cero, a canle de
televisión por Internet de
cuxa creación tivemos oportunidade de dar conta, comezou este
venres, finalmente, a súa primeira tempada de emisión, despois da
difusión do material piloto e da obtención do financiamento preciso
para converterse nunha realidade a través da técnica do
crowdfunding,
que consiste na procura de pequenos investigadores na comunidade
internauta (acadándose o que dificilmente podería acadarse polos
vieiros tradicionais). Segundo nos contan os responsábeis deste novo
proxecto galego (a asociación cultural do mesmo nome), este
inaugurouse co deseño dunha
nova web de seu e coa publicación do primeiro contido que
fornecer: a entrevista realizada ao
sociólogo e autor do libro Hipótesis
Democracia (Traficantes, 2013),
Emmanuel Rodríguez, do que se ofrece asemade a
tradución ao galego dun dos capítulos da obra.
Ademais, a partir de xa e con
carácter periódico, cada xoves ás 22.00
horas haberá un novo programa dispoñíbel,
“alternando semana a semana debates e entrevistas en profundidade”.
Respecto á nova web, un moi ben deseñado
e presentado exemplo do que con toda seguridade está por vir en
materia de divulgación e información audiovisual (ligada á Rede,
participativa, cooperativa, aberta, plural, crítica, social e
tecnolóxica), dicir que está aínda en proceso de desenvolvemento e
quen en vindeiras datas acubillará unha serie de novidades que
cómpre seguirmos de preto: incorporación de ferramentas e servizos,
unha tenda en liña, etc. O equipo responsábel de Galiza Ano Cero
informa que concibe o espazo dixital de seu como “un
espazo de difusión, transparencia e participación, acorde coas
liñas mestras do proxecto”. Liñas entre
as que se contan as seguintes:
-As persoas asociadas, e só as
persoas asociadas á asociación cultural Galiza Ano Cero, poderán
publicar contidos no web. “Tamén terán outros privilexios, como
ver destacados os seus comentarios”, explícase.
-Segundo
nos contan dende Galiza Ano Cero, ver os
programas a través de galizaanocero.tv
posúe vantaxes, en especial unha: cada vídeo ten un sumario para
acceder de forma personalizada aos treitos máis interesantes.
-As microdoazóns, mediante o botón rápido de
90 céntimos, “van ser o mascarón de proa da política coa que
queremos financiar o canal”, informa o
equipo promotor desta televisión en liña.
-O mosaico de portada, un lugar onde se
mesturan os programas, as publicacións e os posts
das persoas asociadas, será moderado
polas usuarias cos seus votos.