Galicia, por debaixo da media nacional en desenvolvemento da SI
martes, 28 de outubro do 2008
A Fundación Orange vén de
presentar o seu último informe anual sobre o desenvolvemento da Sociedade da
Información en España, o eEspaña 2008, que mostra os resultados da posición de
España en Europa con respecto ás TIC.
Segundo este Índice
IeE08, que recolle as facetas de “Entorno”, “Acceso” e “Uso”, España
superou a Letonia, Lituania, Eslovaquia e a República Checa, sendo o segundo país
que máis mellorou en relación ó ano anterior, tan só por detrás de Portugal.
A posición de España (posto 21) con respecto ao Entorno das TIC (indicador
que engloba a penetración das telecomunicacións, o investimento e a innovación
TIC) reflexa o tamaño do sector TIC no país, prexudicado polo escaso mercado TI
de consumo e o moderado emprego destas tecnoloxías nas pequenas e medianas
empresas.
O informe eEspaña mide asemade o grao de converxencia da Sociedade da
Información nas comunidades autónomas e neste senso, Madrid mantén neste índice
a súa posición de líder. Pola súa parte, Galicia sitúase no antepenúltimo posto
por diante de Canarias e Estremadura, logo de experimentar un retroceso en
termos de converxencia, xa que en 2007 se situaba 3 postos máis arriba no ránking.
Asemade, o informe indica que Galicia ocupa a cuarta posición no
desenvolvemento de servizos públicos en liña por comunidades autónomas cunha
media de uso do 77 por cento.
Outros datos importantes que revela o informe da Fundación Orange sobre o
acceso da nosa comunidade ás TIC son os seguintes:
Acceso fogares: Galicia sitúase no penúltimo lugar, unicamente por enriba
de Estremadura, e cun lixeiro descenso con respecto ao ano anterior.
Acceso empresas: a nosa comunidade sitúase na oitava posición do índice,
subindo dende o posto 11 que ocupaba no pasado 2007.
Uso fogares: no tocante ao acceso dende as nosas casas, os galegos
ocupamos a penúltima posición, descendendo dende o posto 8º que ocupabamos o
ano pasado.
Uso empresas: Galicia sitúase na 9ª posición do índice, descendendo dende
o posto oitavo do ano 2007.
O cálculo do índice ICSI e os seus subíndices permítenos detectar as
áreas de mellora en cada rexión no relativo ao desenvolvemento da Sociedade da
Información (as áreas que están por debaixo da media española); neste senso,
Galicia atópase po debaixo da media no nivel de desenvolvemento da Sociedade da
Información dos seus cidadáns.