Galicia coordina as conmemoracións do Día de Internet, dedicado este ano á inclusión dos maiores
xoves, 17 de marzo do 2022
A
rede CeMIT de Galicia, impulsada dende a Axencia para a Modernización
Tecnolóxica de Galicia (AMTEGA) en colaboración cos concellos da
nosa terra, coordinará este ano a programación dunha iniciativa
estatal dirixida a derrubar muros de exclusión tecnolóxica: os
obstáculos que, agravados pola pandemia e polas estratexias
discriminatorias das entidades bancarias, separan a determinados
colectivos en risco (principalmente persoas maiores) das vantaxes das
novas ferramentas dixitais. Estamos a falar da axenda de Somos
Dixital, coa que se conmemora o Día de Internet en España que se
celebra o 17 de maio. Este ano, precisamente a celebración
centrarase na inclusión e capacitación das persoas maiores no uso
das tecnoloxías.
No
marco das actividades previas á celebración do Día de Internet, o
Ateneo de Madrid acolleu este xoves 17 de marzo a lectura do
Manifiesto para facilitar el acceso y el uso de las tecnologías
digitales a las personas mayores. Trátase dun decálogo que
demanda o artellamento de medidas para “garantir a plena inclusión”
destes colectivos na sociedade dixital. Á súa presentación
pública, desenvolvida no marco da celebración do XVI Congreso de
Editores Clabe, asistiu, en representación da Asociación Somos
Dixital, Miguel Rodríguez Quelle, director da área de Sociedade
Dixital da Axencia para a Modernización Tecnolóxica de Galicia
(AMTEGA). Rodríguez Quelle leu a medida 4 do decálogo consensuado
entre todos os membros do Comité de Impulso do #diadeinternet, entre
os que figura a aociación. En concreto, o punto lido pide un esforzo
ao ámbito público neste sentido e menciona o labor que desenvolven
os Centros de Competencias Dixitais para capacitar dixitalmente ás
persoas de idade:
“Desenvolver
iniciativas e plans de axudas públicos para dotar ás persoas
maiores dos coñecementos e habilidades necesarios para que poidan
utilizar de maneira independente as ferramentas dixitais:
dispositivos, aplicacións e servizos e poder garantir así unha
experiencia de uso igualitaria. Apoiar e impulsar as actividades nos
centros de Competencias Dixitais para que os maiores adquiran
autonomía en todas as facetas da realidade dixital”.
A
intervención na lectura deste manifesto é un dos puntos de arranque
da ampla programación coa que a Asociación Somos Dixital
conmemorará o Día da Internet.
Nas
aulas CeMIT
AMTEGA
explica que o vindeiro 7 de abril comezarán, da man da Rede de aulas
CeMIT, apoiada polo Colexio Profesional de Enxeñería Informática
de Galicia (CPEIG), as iniciativas organizadas ao redor da devandita
efeméride inclusiva, que se estenderán ao longo de abril e maio,
incluíndo un reto colaborativo virtual (que ten como obxectivo
chegar virtualmente até Santiago), no que poderán participar as
persoas usuarias dos Centros de Competencias Dixitais de toda España.
Desenvolveranse tamén un Escape Room e unha serie de webinars
sobre servizos dixitais para a mellora da calidade de vida das
persoas, organizados desde as Redes de Centros de Competencias
Dixitais de toda España e coordinados pola Rede CeMIT.
O
#Día da internet celébrase desde 2006
O
#diadeinternet é un proxecto de dinamización social que se constrúe
ao redor das novas tecnoloxías e á data do 17 de maio, designada
pola ONU para a súa conmemoración a nivel mundial. Desde 2006,
celébrase anualmente para dar a coñecer a importancia da rede e as
posibilidades que poden ofrecer as TIC ás persoas e ás sociedades
no seu conxunto.
O
Comité de Impulso que promove o manifesto está composto por máis
de 50 organizacións de recoñecido prestixio, especialmente
interesadas e involucradas en promover o desenvolvemento e o bo uso
da internet e das Novas Tecnoloxías, entre elas a Asociación Somos
Dixital e a AMTEGA.
Os
Centros de Competencias Dixitais e Somos Dixital, a tecnoloxía ao
alcance de todas as persoas
Somos
Dixital é unha asociación composta por organizacións públicas e
privadas que orienta a súa actividade á capacitación e inclusión
dixital de todas as persoas, especialmente daquelas que están risco
de exclusión dixital. Reducir barreiras, xerar valor local a través
das tecnoloxías e, en definitiva, mellorar a calidade de vida son os
obxectivos fundamentais da actividade que despregan máis de 2.000
centros de competencias dixitais distribuídos por toda España,
entre eles as 91 aulas CeMIT de Galicia, e que comparten a súa
experiencia e impulsan as súas sinerxías a través da asociación.