Galicia acolle a sexta edición de UNVEX, o maior evento dos sistemas non tripulados de España
venres, 2 de xullo do 2021
Os
días 7, 8 e 9 de xullo celebrarase na nosa terra o evento UNVEX
2021, o que pasa por ser o máis relevante acontecemento de
cantos se celebran en España centrados nos vehículos aéreos non
tripulados, coa colaboración directa da Axencia Galega de Innovación
(GAIN) a través do Polo Aeroespacial de Galicia. UNVEX’’21, sinala
GAIN, constituirá “un punto de encontro para o sector, e porá o
foco no uso dos vehículos non tripulados nos servizos públicos que
presta a Administración”.
A
axencia que dirixe Patricia Argerey destaca que a elección de
Galicia para esta sexta edición de UNVEX supón “un recoñecemento
ao traballo realizado nos últimos cinco anos no Polo Aeroespacial de
Galicia para converter a industria aeroespacial nun dos sectores
estratéxicos da rexión e unha proba de que xa somos unha referencia
no mapa da industria dos sistemas e vehículos non tripulados”.
O
congreso terá lugar na Cidade da Cultura, onde collerá corpo un
completo programa de conferencias e amosaranse as novidades
presentadas por máis de 60 empresas na área de exposición,
incluídos os avances da industria galega do sector. Desenvolveranse
ademais no Centro de Investigación Aeroportada de Rozas (CIAR) e na
Escola Naval de Marín demostracións de sistemas e vehículos aéreos
e mariños non tripulados.
Como
dixemos, o obxectivo é impulsar dende aquí a industria dos
vehículos aéreos non tripulados, un sector que xerará 1.200
millóns de euros en 2035.
UNVEX
2021 contará con 120 relatores en 22 sesións que se organizan por
bloques sobre Aplicacións públicas e usos comerciais,
que centrarán as conferencias do primeiro día; sendo a temática
Defensa, Seguridade e Emerxencias a cuestión que vertebre a
segunda xornada. O evento rematará cunha sesión de divulgación,
aberta ao público, durante a mañá do día 9 de xullo.
Máis
de 60 expositores
Como
dixemos, UNVEX 2021 ten confirmadas máis de 60 empresas expositoras
nos seus máis de 2.500 metros cadrados de exposición, entre os que
destacan as empresas tractoras do sector, así como pequenas e
medianas empresas e operadoras. Nesta exhibición poderanse ver as
principais as principais novidades tecnolóxicas destas empresas e
tamén contará co seu propio programa de actividades con
conferencias no espazo “Ágora” e as conferencias de divulgación
do día 9 de xullo.
Demostracións
marítimas e aéreas
No
apartado das exhibicións, haberá demostracións tecnolóxicas na
tarde do 8 de xullo na Escola Naval Militar de Marín (Pontevedra),
onde se poderán ver catro sistemas de superficie e un sistema aéreo
deseñado especificamente para operar directamente desde
embarcacións.
O
día 9 de xullo, UNVEX desprázase ao Centro de Investigación
Aerotransportada de Rozas (CIAR), situado no aeródromo de Rozas
(Lugo) no que as e os asistentes comprobarán a operatividade de oito
sistemas de á fixa e á rotatoria e un sistema contra UAS, así como
as súas prestacións.