Galicia Open Future lanza novo desafío empresarial: o Reto COFRICO
martes, 12 de novembro do 2019
Galicia
Open Future, o centro de crowdworking impulsado por
Telefónica para fortalecer proxectos tecnolóxicos innovadores e
fomentar a colaboración entre empresas arredor de desafíos
concretos (desafíos achegados por empresas non TIC para seren
resoltos por empresas TIC), vén de dar un novo paso no seu
desenvolvemento. E
faino lanzando un novo desafío: un reclamo para ser superado polas
nosas empresas do sector dixital.
O
Reto COFRICO, que vén da man da firma galega do mesmo nome (centrada
en refrixeración e climatización) leva por título Como poden as
novas tecnoloxías mellorar a interacción con elementos dun sistema
de eficiencia enerxética para mellorar o seu mantemento preditivo?
Esta
semana, o xoves 14, vai ser presentado por GAIN, COFRICO e Telefónica
dende o Centro Demostrador TIC de Santiago.
O
novo desafío, cuxo prazo de inscrición estará aberto até o
vindeiro 27 de novembro, foi avanzado nos seus detalles os días
pasados: “Nesta proposta buscamos participantes (emprendedores,
startups, PEME, centros tecnolóxicos, universidades, ou unha
colaboración entre elas) que axuden a COFRICO a mellorar e facer
máis eficiente o proceso de estudo, descubrimento e actuación sobre
as instalacións existentes dos seus clientes, conectándose con
sistemas dos que actualmente é moi complicado recompilar
información”, sinalou Telefónica, explicando que a solución
achegada pode dar resposta total ou parcial ao desafío, e o proxecto
gañador terá a oportunidade de desenvolver un piloto real sufragado
por COFRICO, así como acceso a importantes axudas económicas por
parte da Xunta de Galicia.
Como
dixemos, este xoves 14 de novembro celebrarase unha sesión na que a
empresa levará a cabo a definición do reto, nunha sesión que será
retransmitida vía streaming na ligazón
https://cdtic.xunta.gal/es.
A cita desenvolverase entre as 10.00 e as 12.00 horas, no Centro
Demostrador TIC (CDTIC). A proposta será debullada en primeira
persoa polos responsábeis da devandita empresa. “Trátase dunha
boa oportunidade para coñecer a nova empresa tractora e o contexto
no que se lanza este reto, así como para resolver as dúbidas que
poidan exporse en relación con el ou co programa en xeral”,
explica GAIN, que lembra que o prazo de presentación de candidaturas
remata o 27 de novembro.