Galicia Open Future celebra o seu primeiro Demo Day
luns, 21 de decembro do 2015
- Daniel Seijo abrirá o evento cun relatorio sobre financiamento de startups
Mañá ás 16:00 horas na Cidade da Cultura celebrarase o
primeiro Demo Day da segunda edición de Galicia Open Future, evento para o que
os interesados en asistir poden inscribirse
de balde a través dun formulario en liña, e que abrirase cun relatorio de
Daniel Seijo, director xeral de Diariomotor.com, sobre Financiamento para startups, ao que seguirán unha serie de
presentacións de proxectos ou pitches
que servirán así para dar a coñecer aos presentes os participantes desta
iniciativa de Telefónica que conta coa colaboración da AMTEGA.
Galicia Open Future conta
actualmente con 48 proxectos participantes, 20 da Coruña, 12 de
Santiago, 7 de Vigo, 3 de Lugo, 3 de Ourense e outros 3 de Vilagarcía, Tui e norte
de Portugal; proxectos que atópanse en diferentes fases de desenvolvemento
(hainos que son propostas e no outro extremo hai xa algúns comercializándose) e,
malia contar coa TIC como substrato común, os proxectos abranguen sectores
diversos: a madeira, a saúde, o motor, a agricultura, etc.
A iniciativa atópase mergullada na súa primeira fase, na que os responsábeis
dos proxectos elaboran cadanseu plan de negocio. Para isto, reciben
asesoramento e adestramento dun completo elenco de especialistas procedentes de
Telefónica e os seus centros de coworking e crowdworking, con amplos coñecementos en
materias como a mercadotecnia, o comercio electrónico ou a busca de
financiamento. Os emprendedores terán tamén ocasión de compartir experiencias
con outros proxectos de todo o mundo involucrados no programa de innovación
Open Future de Telefónica (no que se integra Galicia Open Future), e que xunta
novas empresas, investidores e entidades públicas e privadas de todo o mundo.
Igualmente dispoñen dunha axuda de 2.000 euros achegada pola Axencia Galega de
Innovación (GAIN).
Na segunda fase de Galicia Open Futere, “unha vez evolucionados xa os
proxectos”, un xurado de expertos seleccionará as tres mellores iniciativas da
aceleradora (estas tres iniciativas recibirán un pulo de 25.000 euros da man de
GAIN, amais de ter acceso a un empréstamo reembolsable de XesGalicia por un
valor máximo de outros 25.000 euros) en función da súa achega aos sectores
estratéxicos de Galicia, a súa innovación, o potencial de mercado, o grao de
maduración e a súa viabilidade, ademais da súa composición multidisciplinaria,
a súa motivación e o uso de tecnoloxía diferencial.
