Galaxia conmemora as vinte edicións en galego de O Principiño cun certame no Twitter
venres, 25 de xaneiro do 2013
Coincidindo
cunha festa que cingue a cativos e maiores unidos polo amor á
lectura (falamos da celebración das vinte edicións en galego de O
Principiño da man da
Editorial Galaxia), o
selo galego vén de pór en marcha un concurso na rede social Twitter
arredor da lendaria e inmortal obra de Antoine de Saint-Exupèry.
O certame, impulsado por Francisco Castro, coordinador de Novos
Proxectos e editor da sección Infantil e Xuvenil da editorial
galega, festexa en realidade algo máis grande: a literatura en si
mesma e o noso compromiso co galego como canle de primeira liña para
acceder á creación universal. Sinalar que hai só uns días que
saíu do prelo a vixésima edición de O
Principiño,
unha obra que comezou a publicarse, na nosa lingua, no ano 1972 en
tradución do escritor Carlos Casares.
Co
gallo destas vinte edicións, ás que seguro que se engadirán moitas
máis, tal e o poder de borrar barreiras entre xeracións do dito
libro, Galaxia puxo en marcha o dito concurso no Twitter, co que se
pretende animar aos internautas a elaborar un breve texto que
explique o porqué da súa fidelidade á obra de Saint-Exupèry.
A
través do hastag #gustameoprincipiñopor todas e todos os que o
desexen poderán participar no concurso até o vindeiro 7 de febreiro
(dúas semanas en total), completando os 140 caracteres que
permitirán a Galaxia saber que é o que nos gusta de O
Principiño. “Entre todos os participantes”, informa
Galaxia, “elixiremos o mellor texto que levará como premio unha
edición en tapa dura da obra de Saint-Exupèry así como un exemplar
de todas e cada unha das obras literarias de Carlos Casares, tradutor
do libro e coleccionista de edicións en distintas linguas da obra”.