GDG Ourense achéganos ás posibilidades das comunidades de desenvolvedores
luns, 20 de febreiro do 2017
Este
mércores terá lugar na Escola Superior de Enxeñaría Informática
de Ourense, no salón de actos Marie Curie, unha charla sobre as
posibilidades de empregabilidade e de desenvolvemento profesional e
laboral que se nos abren seguindo o vieiro da programación
colaborativa. A cita, que vén da man de GDG Ourense (Google
Developer Group Ourense), levarase a cabo baixo o seguinte epígrafe:
High School
Developers Parade #Ourense. Trátase dun evento de balde,
enfocado a estudantes pero tamén a profesionais do desenvolvemento e
o deseño de software. A idea, sinalan os impulsores do evento, “é
aproveitar a mañá do 22 de febreiro para que se coñeza como
funcionan e que poden achegar as comunidades de desenvolvedores”.
Tamén
se botará luz sobre as seguintes temáticas: experiencia na
industria, cultura dunha start-up, consultoría, traballo en remoto,
métodos de aprendizaxe alternativos, como valorar tempo e traballo,
cultivar unha boa actitude profesional, etc. A xornada comeza ás
9:10 horas co rexistro e unha introdución para dar paso a cinco
charlas curtas. De 12:00 a 12:30 haberá un descanso. Para finalizar
organizarase unha mesa redonda onde charlar sobre todo o anterior e
abrir o debate a preguntas. Está previsto pechar o evento ás 13:30
horas. Participan o seguintes relatores: Andrés Martínez Ortiz,
desenvolvedor de Relacións de Grupos de Google, Ana Gómez
Nogueiras, socia fundadora de Masque3d.com, Toni Martínez,
desenvolvedor de IBM Research, Miguel Reboiro Jato, profesor da
Universidade de Vigo, e Jesús Pérez, desenvolvedor de IBM Research.