GAIN senta os alicerces para vindeiras colaboracións cos nosos centros tecnolóxicos
martes, 3 de xaneiro do 2017
Os nosos centros tecnolóxicos, a través de
ATIGA, mantiveron
onte unha xuntanza de traballo coa nova directora da Axencia Galega
de Innovación (GAIN), Patricia Argerey, co fin de avaliar polo
miúdo os camiños de colaboración que se abren co ano entrante.
Participaron na xuntanza os seis centros membros de Alianza
Tecnolóxica Intersectorial de Galicia: Gradiant, Aimen,
ANFACO-CECOPESCA, CTAG, EnergyLab e o Instituto Tecnolóxico de
Galicia (ITG).
Na sesión, a directora de GAIN trasladoulles a
vontade do Goberno galego e do organismo que representa “de seguir
a colaborar nas políticas de innovación como elemento estratéxico
para xerar novas oportunidades ao tecido empresarial galego”. Para
Argerey, que GAIN e ATIGA cooperen de maneira estreita é clave para
fomentar a transferencia tecnolóxica e, en última instancia, o bo
estado de saúde da economía.
“Na medida en que Galicia conte con centros
tecnolóxicos fortes e excelentes e se manteña este nivel de
colaboración”, sinalou, “incrementaranse as posibilidades de
impulsar a transferencia de resultados da investigación á empresa e
á mellora da súa competitividade a través da I+D+i”. Na xuntanza
GAIN e os centros tecnolóxicos tamén tiveron tempo para afondar nos
proxectos arestora en activo, e tamén para preparar os alicerces de
futuras iniciativas conxuntas.
ATIGA lembrou que a día de hoxe desenvolve preto
de 300 proxectos de I+D+i, dos cales o 20% son de carácter
internacional. Ademais, é titular de 75 patentes entre propias ou en
colaboración con empresas, e conta cun equipo formado por preto de
900 traballadores cualificados.