GAIN prevé a creación de 250 empregos cualificados coa nova convocatoria de Unidades Mixtas de innovación
mércores, 18 de febreiro do 2015
Innovación aberta e
cooperación. Esta é a base da iniciativa presentada este mércores en
San Caetano polo director da Axencia
Galega de Innovación (GAIN), Manuel Varela. Máis polo miúdo,
deu
a coñecer os detalles da segunda convocatoria do programa de
Unidades Mixtas da Xunta, que, segundo explicou, diríxese no
xenérico a emendar os posíbeis baleiros de comunicación e
colaboración entre os centros tecnolóxicos e as empresas da nosa
terra e, no concreto, a impulsar centros mixtos de innovación onde
xunten forzas uns e outras. Con esta nova edición, subliñou,
sumarase unha mobilización de 50 millóns de euros “en
desenvolvementos innovadores de alto impacto”.
Sobre os motivos que
alentaron esta nova convocatoria, Varela falou da experiencia xerada
pola anterior edición, “unha experiencia de éxito”, e tamén do
interese amosado dende que se puxo a primeira pedra da edición 2014,
en xullo, por parte de “numerosas empresas”. De feito, dixo, “xa
hai unhas quince empresas que expresaron o seu interese de poder
crear centros de I+D na nosa comunidade de haber unha nova
convocatoria”.
O programa de Unidades
Mixtas, engadiu, busca “funcionar como panca para atraer a grandes
grupos empresariais a innovar en Galicia, en colaboración con
entidades autóctonas como universidades ou centros tecnolóxicos,
garantindo a captación de capital privado para I+D+i; a
contratación de persoal cualificado na comunidade e a transferencia
de coñecemento ao mercado galego para impulsar a competitividade e o
emprego”, entre outros obxectivos.
Na súa opinión, os
beneficios para Galicia destas dúas iniciativas convocadas “son
moitos e variados”, e entre eles inclúense evitar a marcha de
profesionais dende a nosa terra ou contribuír a converter a
comunidade nun referente de excelencia e innovación.
Varela Rey dixo que
esta segunda convocatoria das Unidades Mixtas suma 9 millóns de
euros en apoios, engadíndose aos preto de 7 millóns xa aportados
pola Xunta para a primeira convocatoria. “Ambas, grazas ao
investimento público privado, suman 250 postos de traballo de alta
cualificación”, explicou.
A convocatoria
publicarase este martes 18 na web da Axencia
Galega de Innovación e o prazo de presentación de solicitudes
comeza o martes 24 e remata o 23 de marzo. A iniciativa está aberta
aos centros tecnolóxicos, universidades, fundacións de
investigación sanitaria e centros galegos do Consello Superior de
Investigacións Científicas (CSIC) e do Instituto Español de
Oceanografía (IEO), que acrediten ter captado o interese de empresas
para desenvolver conxuntamente proxectos de innovación, co
compromiso de manter a unidade un mínimo de tres anos. “En canto
ao resto dos requisitos, as unidades mixtas terán que ter entidade
física propia, persoal da empresa destinado nas súas dependencias,
e un orzamento mínimo de 2 millóns de euros”, indicou o director
da axencia.
Varela Rey fixo tamén
falou das primeiras 8 unidades mixtas apoiadas pola Xunta dentro da
primeira convocatoria, enmarcadas en sectores estratéxicos da
economía galega e nas que participan empresas que son unha
referencia nos seus respectivos sectores. Iniciativas das que xa
temos falado en Código Cero, como por exemplo a
que lideran PSA xunto ao CTAG e o CIS Galicia (investigación
para favorecer a condución autónoma, automatizada e intelixente) ou
a que impulsan Everis e Gradiant para mellorar os coidados
socio-sanitarios (tecnoloxías para innovar na saúde pola vía das
TIC).