GAIN e a Tecnópole pechan as formacións da aceleradora galega de solucións anti-COVID: Connect-19
xoves, 5 de novembro do 2020
GAIN
(Axencia Galega de Innovación) e a Tecnópole xuntaron forzas para
impulsar o acceso ao mercado das pemes galegas quen poidan botar unha
man para mitigar as consecuencias da crise sanitaria. Este é un dos
obxectivos de Connect-19: contribuír a que os proxectos galegos
anti-COVID poidan frutificar e converterse en realidade. O dito
programa de aceleración de solucións innovadoras rematou este xoves
5 de novembro a súa fase formativa. O
peche contou coa presenza online da directora de GAIN,
Patricia Argerey, que salientou a axilidade mostrada polas
empresas da nosa terra “ante os novos retos propostos pola
pandemia”.
De
feito, puxo de relevo que partiron das pemes unha grande parte dos
proxectos e solucións innovadoras impulsados polo sistema galego de
innovación en resposta á COVID-19. Argerey chamou ás empresas
participantes “a aproveitar as novas oportunidades de negocio que
abre este contexto”, sinalando “que as empresas que innovan e son
capaces de facer as cousas dun xeito distinto están sabendo
adaptarse ás novas dinámicas do mercado, ás novas necesidades dos
clientes e ás novas canles de distribución”.
Para
rematar, a directora de GAIN apuntou que a Xunta continuará apoiando
e acompañando ao tecido produtivo galego neste camiño “para que a
I+D+i feita en Galicia siga contribuíndo a dar resposta á COVID-19
e á agardada recuperación”.
A
aceleradora desenvolve desde o mes de outubro actividades formativas
orientadas a mellorar as competencias comerciais dos produtos e
servizos innovadores. Esta oferta formativa estivo aberta a calquera
persoa interesada, non soamente ás vinte que participan no programa
de aceleración. De feito, participaron 65 empresas nos dous ciclos
de formación, que tiveron formato virtual e un carácter
eminentemente práctico.
O
primeiro dos bloques estivo centrado na comercialización e o segundo
tratou sobre márketing e visualización nas redes, ofrecendo
as claves sobre como fundamentar o modelo de negocio, elixir as
canles de distribución ou definir a estratexia dixital dos produtos
e servizos contra a COVID-19.
Entre
as propostas aceleradas atópanse produtos como máscaras infantís
biodegradábeis feitas con fibras vexetais, puntos de control de
acceso e de temperatura, sistemas de vixilancia de aforo en espazos
públicos con drons, un kit sensorial para a detección precoz do
coronavirus, ingredientes cosméticos con capacidade antiviral, unha
aplicación para a xestión de dietas en hospitais e ferramentas
orientadas ao teletraballo, entre outras ideas innovadoras.