Funil.gal fortalecerá o galego en materia científica
luns, 12 de maio do 2014
A Comisión
Interuniversitaria de Política Lingüística vai pór en marcha unha
web, botando man do dominio que nos é propio, dirixida
a fortalecer o emprego do galego nos diferentes eidos da
investigación. Máis polo miúdo, trátase do proxecto
Funil.gal, unha iniciativa que procurará dotar “á lingua de novas
ferramentas multimedia para o ámbito científico, inicialmente no
ámbito da química e en concreto no terreo das prácticas de
laboratorio nas tres universidades galegas”. O proxecto contará co
financiamento destas e tamén da Secretaría Xeral de Política
Lingüística e da Secretaría Xeral de Universidades da Xunta de
Galicia.
A devandita comisión, de
presidencia rotatoria entre as tres universidades galegas e
responsábel de iniciativas previas semellantes de promoción e
normalización do noso idioma como por exemplo a campaña En
galego tamén se fai ciencia, celebrou o pasado venres
9 unha xuntanza na Reitoría da USC onde se reuniu por vez primeira
iniciando a quenda da universidade compostelá na súa presidencia.
Na xuntanza participaron o reitor Juan Casares, en calidade de
presidente da Comisión; a secretaria xeral da USC e o da
Universidade da Coruña, Lourdes Noya e Carlos Alberto Amoedo,
respectivamente; os responsábeis de Normalización Lingüística das
tres universidades, Manuel Núñez Singala (USC), Xosé Ramón
Freixeiro Mato (UDC) e Paula Cabral Pedreira (UVigo); o secretario
xeral de Política Lingüística, Valentín García; a subdirectora
xeral de Planificación da Secretaría Xeral de Política
Lingüística, María Elvira Casal García; e o profesor Eduardo
González Gurriarán.