Florencio Delgado, homenaxeado no vindeiro Día das Letras, abre a primeira entrada de 2022 do Álbum de Galicia
mércores, 5 de xaneiro do 2022
O Álbum
de Galicia,
a base de datos online do Consello da Cultura Galega na que se recolle a historia da nosa
terra a través de biografías destacadas,comezou
o ano cunha relevante e significativa incorporación. En
concreto, a do escritor Florencio Delgado Gurriarán (Vilamartín
de Valdeorras, 1903- Fair Oakes, USA, 1987), figura literaria
homenaxeada en 2022 no Día das Letras Galegas, a quen o CCG quixo
adicarlle a primeira entrada do ano. Xosé Ramón Fandiño asina a
entrada deste avogado, militante galeguista e poeta exiliado en
México.
Vida
e obra
Naceu
o 27 de agosto de 1903 en Córgomo (Vilamartín de Valdeorras). Fillo
dun perito agrícola que ademais era funcionario do Ministerio de
Fomento, viviu en Ourense, Palencia e Valladolid, onde estudou
Dereito entre 1918 e 1924. Rematada a carreira e cun novo destino do
pai na Coruña, a familia instálase en Córgomo. Traballou como
avogado no Barco e colaborou dende moi cedo nos xornais El
Heraldo de Galicia,
de Ourense, e en A
Nosa Terra.
Logo de afiliarse ao Partido Galeguista (onde xogou un papel activo e
moi comprometido, sobre todo, coa defensa do idioma), estoupa a
contenda da Guerra Civil e en outubro do 1936 vese obrigado a fuxir a
Porto onde colle un barco para Bordeos. De alí trasládase a París
ata xaneiro de 1938, cando pasou á Barcelona republicana para formar
parte da Subsecretaría de Armamento e despois logo no Servizo de
Información Periférico do Estado Maior do Exército de Terra.
En
1939 exiliouse en México, país no que seguiu loitando polo ideal
galeguista como creador das revistas Saudade
e Vieiros,
fundador do Padroado da Cultura Galega e como representante na
delegación de Galeuzca en México.
Sobre
o seu legado poético, asegura Fandiño na súa entrada que os
vértices da súa poesía arredor de tres eixes temáticos e
estilísticos, primeiro a obra lírica e sensual de Valdeorras,
compilada no libro Bebedeira; segundo, a poesía de loita e defensa
da lingua galega e belixerante contra o fascismo, que se publicou
sobre todo en Nueva
Galicia
e se recolleu no libro
O soño do guieiro;
e terceiro a poesía crioula recollida nas revistas Saudade
e Vieiros
e no libro Galicia
infinda,
na que o autor mostra a súa admiración pola realidade mexicana, e a
capacidade da lingua galega para “dialogar cun sistema literario
tan diferente como o mexicano.
Álbum
de Galicia
En
xaneiro de 2020 o CCG presentou o Álbum de Galicia, unha
colección dixital de biografías de persoas que destacaron en
diversos ámbitos: desde a sociedade, a ciencia, a cultura ou a
empresa. A idea foi “dar visibilidade e perspectiva de conxunto ás
numerosas mulleres e homes, xa finados, que contribuíron de maneira
significativa á sociedade galega ao longo da súa Historia. En
moitos casos, seguen a ser grandes descoñecidos para o público de
todas as idades, de dentro e de fóra do país”, en palabras do
CCG.
As
biografías do Álbum de Galicia están enriquecidas con
material documental, referencias bibliográficas e contidos
multimedia que permiten coñecer a obra das persoas divulgadas, pero
tamén a produción intelectual existente sobre elas.
Ademais,
permite explorar a presenza das persoas biografadas nos fondos
documentais dixitalizados do Consello da Cultura Galega.
O
Álbum de Galicia é o resultado da unificación das
coleccións biográficas temáticas do CCG, que desde o ano 2005
teñen publicado álbums ao redor da muller, a ciencia ou a
emigración, entre outros.