Fitbit podería mercar Pebble por menos de 40 millóns de dólares

Os smartwatches Pebble foron auténticos pioneiros ao trunfar en Kickstarter coa súa proposta de reloxos conectados con pantalla de papel electrónico, que continúan a ser un referente para usuarios que buscan solucións multiplataforma (ou sexa, que funcionen tanto con Android como con iPhone) e unha boa autonomía, á vez que tamén manteñen os seus prezos en rangos razoables (parten do Pebble 2 SE a 99,95 euros e van até os 229,95 euros do Pebble Time Round).
Iso si, parece que a empresa consegue vender os seus produtos a golpe de campaña de micromecenado, o que pode resultar un modelo de negocio que a longo prazo non resulte sustentable (non poden innovar constantemente nun produto tan limitado) de aí que non sorprenda ler en The Information que a compañía estaría a negociar a súa venda a Fitbit, o popular fabricante de dispositivos de monitorización da actividade física.
Dende Engadget lembran que Pebble tivo que despedir ao 25% dos seus traballadores o pasado mes de marzo, e aínda que coméntase que en 2015 Citizen quixo mercar Pebble por 740 millóns de dólares, e máis adiante Intel ofrecese 70 millóns de dólares, agora coméntase que o prezo de venda deste pequeno fabricante independente podería ser de entre 34 e 40 millóns de dólares, o que é unha cantidade moi inferior do que podería esperarse dunha compañía con tan boa imaxe de marca, xa que parece que Fitbit o que procura adquirir é a tecnoloxía e a propiedade intelectual (incluíndo o seu sistema operativo) de Pebble.