Ferrol estrea nova web de emprego
venres, 29 de marzo do 2019
O
Concello
de Ferrol entregou onte os diplomas do obradoiro Costa Web,
impartido durante medio ano no Centro Municipal de Emprego de
Catabois. Na cita participaron o alcalde, Jorge Suárez, o
concelleiro de Emprego, Álvaro Montes, e o delegado territorial da
Xunta na Coruña, Ovidio Rodeiro. No transcurso do acto tamén se
presentou unha nova web para o fomento da formación e o emprego da
cidadanía, concibida e desenvolvida polo alumnado do devandito
curso: un total de 16 mozas e mozos. Na súa andaina formativa
tiveron oportunidade de adestrarse a fondo en desenvolvemento de
aplicacións con tecnoloxía web.
O
obradoiro foi posíbel grazas á colaboración entre o Concello e a
Xunta, que xuntaron forzas para o financiamento da actividade
formativa destinada á mellora da empregabilidade. Os 16
participantes comezaron a súa formación no mes de setembro e
concluíron en marzo, nun obradoiro intenso tanto na parte da
formación teórica como na práctica. O requisito para acceder a
este curso de formación e empregabilidade era ter menos de 30 anos e
estar inscritos no Sistema Nacional de Garantía Xuvenil. A
actividade formativa contou cunha achega de 154.000 euros.
Como
dixemos, grazas ao obradoiro levouse a cabo a o redeseño da web do
Centro de Emprego do Concello de Ferrol
(https://www.ferrol.gal/emprego/),
en palabras do Goberno local “unha ferramenta fundamental para
afondar na promoción do emprego no termo municipal, unha das
prioridades do equipo de Goberno ferrolán”.
Na
súa intervención, o alcalde Jorge Suárez salientou a calidade do
traballo despregado en materia de programación web e destacou tamén
“a importancia de colaborar entre administracións públicas para
impulsar a formación e a calidade do emprego na nosa comarca”.