Fernando Suárez participa este venres nun encontro dixital para resolver cuestións sobre o potencial TIC galego-portugués

O presidente do Colexio Profesional de Enxeñaría en Informática de Galicia, Fernando Suárez Lorenzo, será o protagonista este venres14 de decembro dun encontro dixital a desenvolver polo xornal Faro de Vigo a partir das 11.30 horas, baixo o epígrafe Impulso ás TIC de Galicia e Norte de Portugal. O miolo da súa intervención cos internautas serán as vantaxes do Proxecto NACCE, unha iniciativa da que temos falado en Código Cero en múltiples ocasións, apoiada entre outras entidades polo propio CPEIG, e que se dirixe a apoiar e asesorar ás empresas de novas tecnoloxías galego-portuguesas na busca de novos mercados e meirande competitividade. As persoas que queiran participar no diálogo dixital co presidente do colexio, achegándolle as súas dúbidas sobre a alianza TIC de ámbalas beiras do Miño, poden facelo a través da web da comunidade do Faro de Vigo.
Como dixemos, Colexio Profesional de Enxeñaría en Informática de Galicia (CPEIG) forma parte do grupo de mentores de NACCE, que ten como fin formar a 350 emprendedores e empresas de Galicia e Portugal. NACCE é unha plataforma de colaboración para a creación de empresas TIC. Trátase dunha rede composta por socios e colaboradores que potencia a formación e asesoramento de pequenas e medianas empresas transfronteirizas co obxectivo de ampliar a cifra de negocios e impulsar o seu medre. O obxectivo é estimular a aparición de iniciativas empresariais, aumentar a concorrencia das empresas existentes e, como consecuencia directa, dinamizar o emprego.
No proxecto participa a Consellería de Traballo e Benestar da Xunta de Galicia, a Asociación Galega de Empresas TIC (AGESTIC), a Universidade de Vigo, a Cámara de Comercio de Vigo e dous socios de Portugal: a asociación Aimnho, de Braga, e o CCG, de Guimarâes. Segundo un acordo asinado recentemente, o CPEIG sumouse ao núcleo de apoio ao proxecto mediante a achega da experiencia dos seus colexiados e colexiadas, a asistencia a xornadas e mesas redondas, o estudo de proxectos presentados polos emprendedores TIC e o consello a estes promotores. NACCE inscríbese dentro do Programa Cooperación Transfronteiriza España-Portugal (POCTEP) e conta con cofinanciamento de fondos Feder.