Fene, Mugardos e Neda achegan ás familias un documento con consellos para o acompañamento dixital
xoves, 30 de decembro do 2021
O
Concello de
Fene publicou un documento con consellos para o acompañamento
dixital das familias e entidades. Faino ao abeiro do convenio de
xestión de compartida que mantén cos Concellos de Mugardos
e Neda
e a través do cal as administracións locais xuntan forzas para
previr condutas aditivas entre a poboación.
O
documento en cuestión culmina un ano ateigado de actividades para
fomentar un uso racional, útil e enriquecedor das novas ferramentas
tecnolóxicas, e nel recóllense recomendacións e recursos de
interese a disposición das entidades sociais, as asociacións de
nais e pais e os centros escolares.
Balance
anual de actividades
Ao
abeiro do dito convenio, realizáronse obradoiros dixitais con
entidades sociais, persoas adultas e familias nos que se ofertaba un
espazo formativo dinámico onde falar sobre as redes sociais e como
adaptárense á comunicación dixital coas novas realidades derivadas
da pandemia, como aprender a mellorar a seguridade en Internet
(revisar termos de privacidade nas diferentes aplicacións que se
usan a diario, crear contrasinais seguras, etc.) e como
familiarizarse con conceptos de identidade e pegada dixital (co
obxectivo de coñecer a información que ten Internet sobre nós e
que pegada deixan as nosas accións nas redes).
“Todo
isto”, informaron os ditos Concellos, “abordouse tendo en conta as
emocións e necesidades que nos espertan os usos das Tecnoloxías da
Relación, a Información e a Comunicación e valorando o noso
benestar dixital a través dos usos saudábeis e aqueles hábitos ou
rutinas que nos poden estar a ocasionar certos riscos na nosa saúde
ou seguridade”.