Facebook xa permite editar comentarios realizados tempo atrás
venres, 22 de xuño do 2012
Os usuarios americanos de Facebook son cada vez menos fieis a esta rede
social (algo que se poderá perfectamente extrapolar a todo o mundo), segundo os
datos extraídos dunha enquisa realizada por Reuters e Ipsus a 1.032 estadounidenses,
dos cales, “o 35% admite pasar menos tempo na plataforma que hai
seis anos”.
Perante esta “fuga” de seareiros,
e os problemas económicos polos que está a pasar a compañía momentaneamente, os
seus directivos e persoal técnico vese na obriga de esmagar os miolos para dar coa
fórmula que manteña vivo o interese dos seus usuarios; e as ideas non se
fixeron agardar.
A última funcionalidade engadida para evitar o cansazo dos usuarios da
plataforma é a posibilidade de editar
comentarios realizados en calquera momento, e non só no instante como viña
permitindo ata o de agora.
A única maneira de modificar calquera palabra, erro ou ligazón publicada no
pasado en Facebook, era eliminándoo directamente e realizando un novo; porén a
partir de agora, as persoas usuarias desta rede social poderán corrixir o que
queiran en calquera momento, editando os seus contidos directamente na caixa
que os contén para non “perder” o seu
posto na listaxe de comentarios (de ser caso).
Xa que logo, ao lado do antigo botón de “eliminar” aparece agora un de “editar”,
que permitirá cambiar erros ortográficos, gramaticais, de coherencia, ou
directamente de idioma (se así o desexamos), mantendo a coherencia dos
comentarios alleos.
Isto podería axudar a coidar dos nosos ollos, evitándonos ter que ler
expresións como: “Con tigo síntome ben...”,
“Estou hata o gorro...”, ou “Haber se fago bo dela ...”, entre outros
moitos fallos garrafais que danan a
vista de xeito preocupante; aínda que a cousa non está tanto en corrixir como
en saber que son erros, pois a meirande parte descoñéceo.