FEGAUS e AMTEGA lanzan dous itinerarios para introducir aos maiores nas vantaxes comunicativas e saudábeis das TIC
luns, 15 de maio do 2017
O Plan de Inclusión Dixital de Galicia 2020 da
axencia AMTEGA segue adiante co seu obxectivo de derrubar os atrancos
entre as novas tecnoloxías e as contornas sociais en risco de
exclusión dixital, por exemplo colectivos do rural, de mulleres, de
persoas con diversidades funcionais ou, no caso que nos ocupa, de
persoas maiores. Nesta
liña insírense precisamente dous novos ciclos formativos sobre o
manexo de móbiles e tabletas e sobre as vantaxes das TIC para un
envellecemento saudábel. Os ciclos, que veñen da man da
Federación Galega de Asociacións Universitarias Séniors (FEGAUS),
teñen o nexo común de facilitar o coñecemento e uso duns
dispositivos que, ben empregados, teñen un amplo potencial para
incrementar a nosa autonomía, a nosa comunicación con amigos e
familiares, o noso acceso ao coñecemento, e mesmo a nosa saúde.
O primeiro itinerario formativo arrincou o pasado
12 de maio e rematará o 23 de xuño. Leva por título Saca o
máximo partido ao teu teléfono intelixente ou tableta
e goza de todo o que Internet che ofrece e
está destinado a persoas cun nivel de uso inicial das novas
tecnoloxías. Esta primeira quenda chegará a 12 aulas da rede CeMIT,
que ofertan preto de 200 prazas en total, e cuxa inscrición figura
aberta na web cemit.xunta.gal.
As aulas desta primeiro ciclo son: Arzúa, Beariz, Boborás, Catoira,
Celanova, Cuntis, Fisterra, Marín, Oroso, Sada, Santa Comba e Valga.
Os seminarios impartiranse presencialmente desde unha aula CeMIT e
poderanse seguir por videoconferencia nas restantes aulas.
O segundo dos itinerarios, Usa as novas
tecnoloxías para unha madurez máis activa e positiva,
celebrarase unha vez remate o período estival, nos meses de setembro
e outubro, cando se desenvolverán outras sete xornadas con outras
200 prazas dispoñíbeis.
Os seminarios do primeiro ciclo realizarase todos
os venres comprendidos entre o 12 de maio e o 23 de xuño (7
xornadas), en horario de 11:00 a 12:30 horas, de maneira presencial
nunha aula CeMIT e seguíndose nas demais aulas CeMIT por
videoconferencia.
O alumnado disporá dun soporte titorial que
realizará FEGAUS, a través dos seus titores en liña, “de xeito
que tras finalizar cada un dos seminarios poidan acceder a máis
información relativa aos contidos da materia tratada”, informa
AMTEGA, engadido que ese soporte incorporarase na
plataforma de teleformación coa que conta a rede CeMIT, así
como á resolución de dúbidas como nun curso en liña tradicional.
FEGAUS, como lembraremos, é un dos 700 aliados
dixitais do Plan
de Inclusión Dixital de Galicia 2020, impulsado pola Axencia
para a Modernización Tecnolóxica de Galicia (AMTEGA). A este plan
pódense adherir aquelas empresas e entidades interesadas en
participar “no desenvolvemento da sociedade dixital en Galicia no
marco da súa responsabilidade social empresarial”, mediante a
achega de recursos financeiros, humanos ou, como neste caso, de
coñecemento.
O Plan de Inclusión Dixital é a estratexia
autonómica para facilitar a calquera persoa, con independencia do
nivel dixital no que se atope, avanzar, madurar e acceder a maiores
niveis de coñecemento e uso das TIC.