FACUA advirte dunha gran suba de prezos nos servizos de telefonía fixa de Movistar
mércores, 16 de marzo do 2011
Por se non fora pouco coa subida da luz, dos
combustibles e demais, os consumidores españois veñen de advertir dunha posible
alza nos prezos dos servizos de Movistar que pode que deixe a máis de un
usuario a piques de darse de baixa de calquera contrato telefónico que teña
asinado e volver, porque se cadra non queda outra, aos tempos en que se
procuraba á xente petándolle na porta. Así nolo conta FACUA-Consumidores
en Acción, para quen está claro que a dita operadora prepara unha suba de
prezos a partir do 1 de xuño que afectaría aos usuarios de telefonía fixa e que
implicaría, entre outras cousas, un incremento do 150% no prezo por minuto das
chamadas nacionais.
No que respecta ao establecemento da
comunicación, a suba sería do 50%.
Para a asociación de consumidores, estes
feitos débense á liberalización aplicada polo Goberno de España, “contraria aos intereses dos consumidores ao
non terse establecido unha tarifa máxima/referente”.
A partir do documento en cuestión da operadora
no que se informa destes cambios (nun documento en formato PDF),
FACUA advirte tamén de que Movistar
pretende aplicar unha cortina de fume sobre o devandito medre de prezos
esgrimindo unha simplificación das tarifas nun único horario, de 0 a 24 horas,
de luns a domingo, co fin de ofrecernos unhas condicións comerciais máis
sinxelas.
O medre de custes, engaden, afectará sobre todo aos de sempre, aos cidadáns
con menos recursos, que son os que non contratan tarifas planas polo reducido
do seu número de chamadas.