Expourense reúne este venres a vangarda profesional da mercadotecnia en liña
mércores, 2 de novembro do 2016
Este venres 4 temos cita en Ourense coa innovación
ao servizo da mercadotecnia. Ou sexa, con todos os recursos dixitais
cos que podemos contar (e son moitos e variados) para que chegar ao
meirande número de clientes e deixar a máxima pegada no mercado.
Falamos
da nova entrega do Foro de Comunicación de Galicia, que se celebra
en Expourense (da man, precisamente, deste centro de mostras e
congresos), e que xuntará baixo un mesmo teito a algúns dos
expertos actuais de meirande renome en materia de estratexias
dixitais ao servizo da identidade corporativa. Por exemplo o
presidente do Foro de Marcas Renomeadas Españolas, José Luís Bonet
ou o publicista Marçal Moliné. Tamén
achegarán relatorios representantes de Google, Galejobs, R ou
Elogia.
En palabras de Expourense, “a cita ofrecerá un
completo programa de conferencias nas que este ano cobrará especial
protagonismo o mundo online e a estratexia de marca”.
En total, haberá unha vintena de relatorios a
cargo de expertos en novas tecnoloxías e mercadotecnia, escolas de
negocios, profesores universitarios, xornalistas ou empresarios.
Amais de debater sobre o emprego dos medios dixitais, tamén se fará
fincapé no fomento dunha cultura de emprendemento a través de
conferencias sobre internacionalización e experiencias de xestión.
A conferencia inaugural virá da man do director
do programa de dirección en comunicación corporativa IE Business
School, Enrique Sueiro. O programa continuará cunha mesa redonda que
versará sobre estratexias de transformación tecnolóxica e na que
participarán responsábeis de comunicación e social media de
empresas galegas referenciais como as devanditas Estrella Galicia,
Galejobs, R Cabel e Elogia. A continuación celebrarase un relatorio
orientado a analizar as relacións entre os profesionais da
comunicación da empresa e dos medios, a cargo do xornalista Luis
Fraga.
Para organizar o programa deste Foro, Expourense
conta coa colaboración das facultades ligadas á Comunicación da
Universidade de Vigo e a Universidade de Santiago, o Clúster da
Comunicación Gráfica de Galicia e asociacións como MARKEA
(Asociación Galega de Mercadotecnia), DIRCOM Galicia (Asociación de
Directivos de Comunicación de Galicia), Creatividade Galega e da
Asociación Galega de deseñadores Gráficos. Tamén se conta co
apoio da Consellería de Economía e Industria, a través do IGAPE e
a Deputación Provincial de Ourense.
Este 4º Foro da Comunicación de Galicia
clausurarase por primeira vez coa entrega de Premios da Comunicación
e a Mercadotecnia de Galicia, promovidos polo Clúster da
Comunicación Gráfica, do que se achegará información logo da
xornada.