Expertos en computación dunha ducia de países participarán en Santiago no congreso CTMI
luns, 15 de xullo do 2019
Un
prestixioso e sobranceiro elenco de expertos internacionais
presentará en Santiago os avances máis innovadores das matemáticas
para resolver problemas da industria e da sociedade (problemas reais
e concretos das empresas, da profesión médica, do activismo a prol
do medio ambiente e a loita contra o cambio climático), botando man
de aplicacións baseadas en estatística, información a gran escala
(Big Data), modelado, simulación e optimización. Estamos
a falar do primeiro Congreso sobre Transferencia entre Matemáticas e
Industria, o CTMI 2019, que se celebra entre o 22 e o 24 de xullo en
Santiago.
Detrás
deste importante evento atópase o Instituto Tecnolóxico de
Matemática Industrial (ITMATI), participado polas tres universidades
galegas e con sede no Campus Vida, que contará, para a realización
do congreso, co apoio da European Service Network of Mathematics for
Industry and Innovation (EU-MATHS-IN), a Axencia Galega de Innovación
da Xunta de Galicia (GAIN), a Rede Estratéxica en Matemáticas (REM)
e a Enterprise Europe Network.
Como
dixemos, o CTMI 2019 reunirá a destacadas personalidades
internacionais do ámbito da empresa, a ciencia e o mundo académico
co propósito de promover o uso das matemáticas máis innovadoras na
industria. Os participantes proceden de diferentes países de Europa,
América, África e Asia; en particular de Francia, Hungría, Italia,
Luxemburgo, Noruega, Alemaña, Ucraína, Rusia, Estados Unidos,
Kazajistán e Alxeria; ademais de diversos puntos de Galicia e do
resto de España.
A
finalidade concreta deste encontro internacional é a promoción e
difusión de ferramentas matemáticas xunto ás súas aplicacións
industriais. No transcurso do mesmo presentaranse novas liñas de
investigación orientadas ás necesidades da industria e da sociedade
en xeral. E daranse a coñecer algunhas experiencias singulares de
transferencia de resultados á industria. Tamén se porá foco en
mostrar como a colaboración entre o mundo académico e a industria
permitiu abrir novas liñas de investigación no eido das matemáticas
e a súa reflexión en publicacións de impacto internacional.
No
marco deste encontro terá lugar unha actividade paralela de
divulgación da tecnoloxía matemática á sociedade en xeral. Será
o 23 de xullo no Auditorio Abanca de Santiago (rúa Preguntoiro), de
20:00 a 21:00 horas. Antonio Pita Lozano, responsábel global de
analítica e consultoría en LUCA, Unidade de Datos de Telefónica,
ofrecerá a conferencia Datos e matemáticas. Os
propulsores das compañías data driven. Versará sobre o valor
da información para as empresas: un activo estratéxico para a
transformación dixital. Durante a súa intervención fará un
percorrido sobre o reto de sacar rendemento aos datos mediante
modelos matemáticos de Intelixencia Artificial e estatística co
obxectivo de aumentar os ingresos empresariais, reducir os custos e
mitigar os riscos para mellorar a xestión empresarial.
Congreso
bianual
A
deste mes de xullo en Santiago é a primeira edición deste congreso
de transferencia matemática en España, promovido pola Rede Española
Matemática-Industria (math-in) e que prevé ter edicións bianuais.
O CTMI 2019 é un evento satélite de ICIAM 2019 (International
Congress on Industrial and Applied Mathematics), un congreso que
se celebra cada catro anos. A anterior edición foi en Pequín e a
vindeira terá lugar en Xapón. Este ano celebrarase en Valencia a
semana previa ao CTMI 2019 de Santiago -do 15 ao 19 de xullo- e está
previsto que asistan máis de 4.000 congresistas.