Éxito da vertente virtual da mostra que conmemorou o legado de Isaac Díaz Pardo
luns, 31 de maio do 2021
A
Cidade
da Cultura despediu esta finde a mostra As miradas de
Isaac, o máis completo percorrido visual e expositivo
pola vida e o legado dunha grandes figuras da historia recente de
Galicia: Isaac Díaz Pardo. A iniciativa botou o peche cun concerto
no Museo Centro Gaiás do cuarteto de corda Grupo Instrumental s. XX
con todas as entradas, previa retirada de convite, esgotadas. A
mostra, organizada pola Xunta para homenaxear ao principal impulsor
da fábrica de Sargadelos co gallo do centenario do seu nacemento (en
2020), foi un éxito na súa vertente física (recibiu máis de
26.000 visitantes) e na súa vertente virtual (con preto de 2.500
escolares de Primaria afondando nos contidos da exposición a través
de visitas didácticas en liña realizadas polo persoal de guías do
Museo Centro Gaiás e emitidas en directo a través da
canle de YouTube da Cidade da Cultura).
A
mostra, comisariada por dous dos fillos de Díaz Pardo (Camilo e Xosé
Díaz Arias de Castro), estivo conformada por máis de 500 pezas,
entre obras de arte, esculturas, cerámicas, publicacións, carteis e
obxectos persoais. A través delas reflectiuse “a inesgotábel
creatividade” de Díaz Pardo, “un personaxe clave da cultura
galega do século pasado, responsábel de iniciativas e proxectos tan
relevantes como por exemplo a recuperación de Sargadelos, o
Laboratorio de Formas, o Instituto Galego da Información, Ediciós
do Castro ou Museo Galego de Arte Contemporánea Carlos Maside”.
Visita
virtual e páxina web
- Concerto de clausura na Cidade da Cultura
Para
“compensar o peche de actividade presencial do Museo Centro Gaiás
en determinados intres pola situación da COVID”, a mostra contou
cunha aplicación virtual, que permitía percorrer a través de
calquera dispositivo móbil as dez seccións da exposición,
completadas con información polo miúdo de pezas destacadas e tamén
con pílulas audiovisuais que se podían descargar.
Ademais,
a mostra viuse reforzada coa posta en marcha da
páxina web Isaac Díaz Pardo. Memoria viva; que se
converteu “nun espazo virtual de referencia onde concentrar e
atopar todo o seu universo creativo”, conformado entre outros
elementos por documentos históricos, vídeos, fotografías ou
material didáctico.
Tras
o peche desta fin de semana no Museo Centro Gaiás en Santiago de
Compostela, As miradas de Isaac comezará nas vindeiras semanas un programa de itinerancias por varias cidades galegas.