Estudantes da ESEI de Ourense visitan o CESGA
mércores, 13 de abril do 2016
O
pasado luns 11 de abril 35
estudantes de grao e mestrado da Escola Superior de Enxeñaría
Informática do campus de Ourense achegábanse até as instalacións
do CESGA (Centro Tecnolóxico de Supercomputación de Galicia) en
Santiago de Compostela co gallo de coñecer de preto todo o
ensarillado que supón o centro de cálculo de
referencia en Galicia, declarado
Infraestrutura Científico Tecnolóxica Singular de España. A
visita ao CESGA xorde no contexto da materia Computación
distribuída e de altas prestacións, do Mestrado en Enxeñaría
Informática que se imparte no centro ourensán.
“Foi
unha visita moi interesante. Puidemos coñecer as súas instalacións
e servizos, falar da posibilidade de prácticas extracurriculares e
de colaboracións relacionadas con traballos fin de mestrado dos
estudantes, amosando dende o CESGA toda a súa dispoñibilidade”,
apuntou Leandro Rodríguez, o docente promotor da actividade.
E
volvendo ao percorrido polo CESGA, dicir que se dividiu en dous
grupos que tiveron a oportunidade de escoitar as explicacións de
Javier García Tobío, director-xerente da Fundación CESGA, e de
técnicos das áreas de proxectos, comunicacións e sistemas, que
contaron polo miúdo todo o relacionado cos servizos que presta este
centro ao seus usuarios. “O alumnado tivo a oportunidade de coñecer
de primeira man as aplicacións prácticas de investigación que
teñen as altas prestacións e os servizos que dá o CESGA a empresas
e institucións”, comentou o docente. A visita permitiulle aos
estudantes ver as infraestruturas dispoñíbeis, como os
supercomputadores e os sistemas de protección e mantemento, entre
outros equipos.
Para facérmonos unha idea da importancia da
Fundación Pública Galega Centro Tecnolóxico de Supercomputación
de Galicia, cómpre sinalar que estamos perante un centro de cálculo,
comunicacións de altas prestacións e servizos avanzados, estando as
súas infraestruturas encamiñadas a achegar grandes potencias de
cálculo computacional en contornas científico-tecnolóxicas por
medio de diferentes arquitecturas, así como permitir á comunidade
científica galega acceder ás redes académico-científicas estatais
e internacionais por medio de grandes anchos de banda.
Engadir,
por último, que a visita realizada polos estudantes da Escola
Superior de Enxeñaría Informática ao CESGA, era a primeira pero
dado o seu interese para a formación do alumnado, os seus promotores
agardan repetila o vindeiro curso académico.